Kogon: Tutkundada Safarov xonadonida boʻrdoqichilikdan 150 million soʻmga yetkazib daromad qilinmoqda
2026-03-12 15:40:00 / Yangiliklar
Tutkunda qishlogʻida yashovchi Ziyodullo Safarov ham ayni kunda nafaqada boʻlishiga qaramay, xonadonida chorvachilik bilan muntazam shugʻullanib, oilasi moddiy manfaatdorligini taʼminlamoqda. U koʻp yillik tajribaga ega boʻlib, chorvachilik sir-asrorini puxta egallagan. Xonadonida mahalliy va xorijiy nasldor mollardan oʻndan ortigʻi, yana 15 bosh qoʻy parvarishlab kelinmoqda.
Chorva mollari uchun zarur ozuqa, yem-xashak yetarlicha jamgʻarilgan boʻlib, uy xoʻjaligi rahbari ayni kunda ekin yerini kengaytirish, boʻrdoqiga boqilayotgan mollari sonini koʻpaytirish harakatida.
Xususan, xonadonda parvarishlanayotgan chorva mollari talab darajasida oziqlantirilib, ularga zarur zooveterinar xizmati koʻrsatilmoqda. Gidroponika texnologiyasi asosida bugʻdoy va boshqa boshoqli don mahsulotlari ekilib, ivitish yoʻli bilan shirali ozuqa tayyorlanmoqda. Bu zamonaviy usul ozuqaning toʻyimliligini oshirib, qoramol va qoʻylarning sogʻlom oʻsishi hamda vazn olishiga ijobiy taʼsir koʻrsatmoqda. Bundan tashqari, yem-xashak xaridi uchun sarf-xarajati ham sezilarli darajada kamaymoqda.
Ziyodullo Safarov uy xoʻjaligida yetishtirilayotgan goʻsht mahsulotlari mahalliy bozorda xaridorgir boʻlib, bir yilda 1,5 tonnaga yaqin goʻsht tayyorlanib, mahalladoshlar dasturxoniga yetkazilmoqda. Bundan erishilayotgan moddiy manfaatdorlik esa bir yilda 150 million soʻmdan kam emas. Muhimi, halol mehnat ortidan bir oila qut-barakaga erishib, roʻzgʻoriga qut-baraka kiritmoqda.
Viloyat hokimligi matbuot xizmati