Buxoro viloyati hokimligi

Deylik, bu ayol 100 kvadrat metr maydonda qoʻziqorinning shu navini ekib, muvaffaqiyatli yetishtirmoqda. Shu yilgi hosilning birinchi terimida 500 kilogramm mahsulot olingan. Hozirda “shampinyon”ning oʻrtacha narxi bozorda oʻrtacha 80-90 ming soʻmni tashkil etmoqda. 

Qorongʻi va salqin xonada yetishtirilayotgan, polietilen qopchalarni yorib chiqib boʻy koʻrsatayotgan qoʻziqorindan bir yilgi mavsumda oʻrtacha 4-5-marta hosil yetishtirish, bundan mehnatga yarasha foyda koʻrish mumkin. Yarim sotixda boshlangan ”shampinyon” naviga mansub qoʻziqorin yetishtirishdan xomaki moʻljalga binoan 30 million soʻmga yetkazib daromad olish imkoniyati allaqachon tajribada sinalgan. Hozirda oʻzgacha uslubda, qayta ishlangan chigit sheluxasida yetishtirilayotgan xaridorbop qoʻziqorin bir oy muddatda sotishga tayyor boʻladi.

— Ikki yil burun qoʻziqorin yetishtirishni ijtimoiy tarmoqlar orqali koʻrib, qiziqib, oʻz xonadonimizda yetishtirishni boshlaganmiz,—deydi Gulchehra Sharopova.—Birinchi oʻrinda, qoʻziqorin yetishtirishda haroratga eʼtibor berish, xonadagi haroratni 23 darajada saqlash lozim. Bu mahsulot ichkarida qorongʻu va zax joyda parvarish qilinsa, hosili yaxshi boʻladi. Chigit poʻstlogʻi—sheluxani sellofan qopchalarga joylab, unga qoʻziqorin urugʻini ekkanimizdan soʻng 30 kun nari-berisida isteʼmolga yaroqli xushxoʻr qoʻziqorin tayyor boʻladi. Vazni yengil boʻlgani bilan barakali mahsulot, ham xaridorgir.

Bugun mehnat va tashabbus samarasini koʻrib, daromadga erishayotgan ayolning oʻtgan yillarda mahalla ehtiyojmand oilalari qatorida "Ayollar daftari"ga kiritilganiga ishonish qiyin. Xonadondan boshlangan harakat, sabr va hunar bilan qoʻshilib barqaror daromad manbaiga aylandi. Bu ham albatta, bor imkoniyatdan unumli foydalanish, mehnat va masʼuliyatni zimmaga olishning samarasi.  

Viloyat hokimligi matbuot xizmati