Buxoro viloyati hokimligi

Bugungi kunda “Buxoro agro star” MCHJ hamda “Gala River” MCHJ negizida “Oʼlmas Gold” MCHJ tomonidan zamonaviy agrosanoat majmuasi va enoturizm markazini barpo etish loyihasi amalga oshirilmoqda. Loyiha qiymati 20,5 milliard soʻmni tashkil etib, unda yiliga 250 ming dona plastik yashik, 5 ming tonna uzum sharbati ishlab chiqarish, 600 tonna sigʻimga ega sovutkichli ombor hamda yiliga 43 ming nafargacha mahalliy va xorijiy sayyohlarga xizmat koʻrsatadigan enoturizm markazi qurilishi rejalashtirilgan. Majmuani 2026-yil syentabr oyida ishga tushirish koʻzda tutilgan.

Shuningdek, loyiha doirasida Xitoyning “HAITAN” va Vengriyaning “Maurer Gep Kft.” kompaniyalari bilan oʻzaro zarur dastgoh va uskunalar yetkazib berish boʻyicha shartnomalar imzolangan. Enoturizm markaziga olib boruvchi yoʻl infratuzilmasini yaxshilash maqsadida esa mahalliy byudjetdan 5 milliard soʻm mablagʻ ajratilgan.

Bundan tashqari, “Tomorqa maktabi” orqali 120 nafar tomorqa yer egasi  oʻqitilgani holda ular bilan qishloq xoʻjaligi mahsuloti yetkazib berishga doir shartnomalar imzolanmoqda. Shuningdek, amaldagi qonunchilik talablariga binoan tanlab olingan mahallalardagi jami 9 mingdan oshiq xonadon va tomorqa yer egalari bilan agronomik xizmatlar koʻrsatish, tuproq va suv tahlili, koʻchat yetkazib berishga doir yaqin hamkorlik qilish chora-tadbiri belgilandi. 

Shu bilan birga, “Rabotak” mahalla fuqarolar yigʻinida 7 gektar maydonda qiymati 3,6 milliard soʻmga teng namunaviy innovatsion uzum yetishtirish bogʻi—tokzor barpo etish koʻzda tutilgan. Mazkur loyiha asosida uzumchilikka ixtisoslashgan fermer xoʻjaliklari hamda aholi xonadonlarini qamrab oluvchi kooperatsiya tizimini yoʻlga qoʻyishga qaror qilingan. 

Viloyat hokimligi matbuot xizmati