Buxoro viloyati hokimligi

Maʼlum qilinishicha, yurtimizda aholining ommaviy sport bilan qamrovi 15 million nafarga yetgan, soʻnggi yillarda sport bilan doimiy shugʻullanuvchilar soni qariyb 1,5 barobarga oshgan. Shu bilan birga, bu koʻrsatkichlar bilan cheklanib qolmasdan, yaqin istiqbolda ommaviy sport bilan shugʻullanuvchilar sonini 17 million nafarga yetkazish zarurligi uqtirilgan. 

Oʻtgan yilda oʻzbekistonlik sportchilar xalqaro maydonda qator yutuqlarga erishgani, xususan, yoshlar jahon universiadasida 13-oʻrinni egallagani, Bahrayndagi Yoshlar oʻyinlari va Saudiya Arabistonida oʻtkazilgan Islom birdamligi musobaqasida 2-oʻrin, BAAda boʻlib oʻtgan Yoshlar Paraosiyo oʻyinlarida esa umumjamoa hisobida 1-oʻrin qayd etilgani munosib yutuq, albatta. Futbol boʻyicha milliy terma jamoa ilk bor jahon chempionati yoʻllanmasini qoʻlga kiritgani, shaxmatda Javohir Sindorov va Nodirbek Abdusattorovlarning erishayotgan muvaffaqiyatlari barchamizni benihoya xursand qilmoqda. 

Bugun viloyat hokimligida respublika Sport vaziri Adham Ikramov ishtirokida boʻlib oʻtgan yigʻilishda ommaviy sportni rivojlantirish, sport maktablari, federatsiyalar faoliyati bilan birga mahalla va taʼlim maskanlarida yoshlarni jismonan chiniqtirish, sportga jalb qilishning dolzarb ahamiyati, joriy yilda bu borada amalga oshirilayotgan ishlar muhokamasiga eʼtibor qaratildi.  

Viloyat hokimining oʻrinbosarlari, hududdagi oliy taʼlim muassasalari, sport maktablari rahbarlari, ijtimoiy soha masʼullari, shahar va tumanlar studiyalaridan tegishli mutasaddilar, tashkilot va idoralar rahbarlari, murabbiylar hozir boʻlgan yigʻilishni viloyat hokimi Botir Zaripov olib bordi.

Qayd qilinganidek, ayni kunda viloyatda 3297 ta sport inshooti boʻlib, keyingi yillarda bu majmualar 1437 taga koʻpaygan va ular oʻzidagi sport seksiyalarida oʻnlab, yuzlab sportsevarlarni birlashtirgan. Ayni kunda oʻttizga yaqin sport turi bilan viloyatimizda 53 mingdan oshiq yosh yigit-qiz shugʻullanayotgan boʻlsa, shulardan 800 dan oshigʻini parasportchilar tashkil etadi. Soʻnggi uch yilda viloyatda 21 ta sport inshooti qad rostlagan boʻlsa, shundan oʻtgan yili barpo qilingan 8 ta majmuaga umumiy qiymati 20 milliard soʻmdan ziyod mablagʻ sarflangan. 

Tanqidiy ruhda oʻtgan muhokamada respublika Sport vaziri A. Ikramov tomonidan sohani yanada rivojlantirish, sport maktablari va mahallalar oʻrtasidagi hamkorlikni uzviy yoʻlga qoʻyish yuzasidan masʼul mutasaddilar zimmasiga qator vazifalar yuklandi. Ayrim sport turlari boʻyicha natijalar mavjud infratuzilma va salohiyatga toʻliq mos kelmayotgani koʻrsatib oʻtildi. Shu sababli yaratilgan sharoitlardan samarali foydalanish, sport zaxirasini kengaytirish va tizimli seleksiyani kuchaytirish vazifalari belgilandi. Xalqaro sport oʻyinlari va Olimpiadalar uchun munosib zaxira yaratish maqsadida yoʻlga qoʻyilgan Prezident olimpiadasini rivojlantirish muhim ekani taʼkidlandi.

Shuningdek, yigʻilishda “5 tashabbus olimpiadasi” doirasida viloyatda 2026-yilda tashkil qilinadigan ommaviy sport musobaqalari taqdimoti muhokama qilinib, hududdagi sport maktablari faoliyati, ular reyting natijalari, amalga oshirilishi zarur boʻlgan tashkiliy chora-tadbirlarga eʼtibor qaratildi.

Viloyat hokimligi matbuot xizmati