Jondor: “Tobagar”da Sayliyev chorva xoʻjaligi kengaymoqda
2026-03-10 11:20:00 / Yangiliklar
Tahlillardan koʻrinishicha, bugunga kelib viloyatdagi mavjud 416 ta qoramolchilik fermasi, 162 ta mayda shoxli mollar qoʻra-qasharlari, 14 ta parrandachilik fabrikasi va 84 ta parrandachilikka ixtisoslashgan fermer xoʻjaligidagi tovuqxona binolari mavsumga tayyorlangani holda zarur ozuqa bazasi zahira qilingan. Chorvachilikda ozuqa bazasini mustahkamlash boʻyicha viloyatdagi chorvachilik va parrandachilik xoʻjaliklariga ozuqabop ekinlar ekish uchun 49 ming 441 gektar ekin yer maydoni ajratilgan.
Ayni kunda viloyat tumanlaridagi mavjud ekin yeri maydonida, 11 ming 108 gektarda oʻt beda, 36 ming 752 gektar yerda makkajoʻxori, 1 ming 581 gektarda xashaki lavlagi, 18 ming 200 gektar yerda makkajoʻxori ekib yetishtirilmoqda. Samarasi past, kam hosilli paxta va gʻalla maydonlarida har yili almashlab ekish tizimi orqali 15,8 ming gektar yerda beda ekinlarini ekish, Qorovulbozor, Romitan, Peshkoʻ, Jondor, Olot va Qorakoʻl tumanlarida yer maydonlarini oʻzlashtirib, qoʻshimcha 1,2 ming gektar yerda ozuqabop chorva mahsulotlari ekib yetishtirilmoqda.
Shu bilan birga, ayni paytda aholi xonadonlarida chorvachilikni rivojlantirish, nasldor qoramol zotlarini koʻpaytirish, ularni sanoat usulida parvarishlashga qiziqish hamisha kuchli boʻlgan. Jumladan, Jondor tumani Tobagar mahallasida istiqomat qiluvchi chorvador Yorqin Sayliyev bugunga kelib nafaqat oʻz xonadoni farovonligini oshirmoqda, balki qishloqdoshlari uchun ham naf keltirib, mahsuldorlikni oshirmoqda.
Yorqin Sayliyev ilgʻor tajriba va zamonaviy yondashuvlarga tayangan holda, mahalliy “Qizilchoʻl”, qora-ola va “Eston” zotlariga mansub chorva mollarini parvarish qilib, moddiy manfaatdorlikka erishmoqda.
—Parvarishi yaxshi boʻlsa, qora-ola yoki boshqa zotdor qoramollardan yuqori mahsuldorlikka erishish mumkin. Bu turdagi qoramollar ayniqsa, sut yetishtirish va iqlim sharoitiga moslashuvchanlikda ajralib turadi,—deydi tajribali chorvador Yorqin Sayliyev.—Gavdasi yirik, sogʻlom va parvarishga chidamli boʻlgan bu zotdan bir kunda oʻrtacha 10-12 litr sut olish mumkin. Boʻrdoqichilikda, goʻsht yetishtirishda esa “Eston” zotli chorva mollari yuqori iqtisodiy samaradorlikka ega. Shu bois, hozirda xoʻjaligimizda tuyoq sonini koʻpaytirish, ekin yerini kengaytirib, chorva mollari mahsuldorligini oshirish harakatidamiz.
Viloyat hokimligi matbuot xizmati