Buxoro viloyati hokimligi

Tantana qatnashchilariga viloyat hokimining tabrik so‘zi o‘qib eshittirildi.  

Tabrikda ta’kidlanganidek, so‘nggi yillarda Prezidentimiz tashabbusi bilan xotin-qizlarning huquq va manfaatlarini to‘liq ta’minlash, ularning qadr-qimmatini ulug‘lash Yangi O‘zbekistonning davlat siyosatida yetakchi o‘rinni egallamoqda. 

Bugungi kunda ayollarimiz turli soha va tarmoqlarda Vatanimizning, shu jumladan viloyatimizning jadal taraqqiyoti uchun munosib hissa qo‘shayotganlarini alohida ta’kidlash o‘rinlidir.

Masalan, 2017-yilda viloyatda boshqaruv sohasida xotin-qizlar ulushi o‘rtacha 20 foizni tashkil etgan bo‘lsa, hozirda bu raqam 31 foizga yetdi. Xalq deputatlari mahalliy Kengashlari a’zolarining 36,7 foizini ayollar tashkil etmoqda, viloyat, shahar va tumanlar hokimlik apparatlarida 63 nafar ayollar bevosita rahbarlik lavozimlarida faoliyat yuritmoqda. Ayollarning davlat boshqaruvi va parlament faoliyatidagi ishtiroki kuchaygani jamiyatimiz rivojiga ham ijobiy ta’sir etayotganini hayotning o‘zi ko‘rsatmoqda.Eng muhimi, aql-zakovatli, bilimli va iste’dodli xotin-qizlarimiz davlat va jamiyatning barcha sohalarida namuna bo‘lishmoqda.O‘tgan yili faqatgina xalqaro darajadagi  musobaqalarda mamlakatimiz delegatsiyasi tarkibidagi viloyatimiz ayol sportchilaridan 24 nafari sovrindorlar safidan o‘rin olishdi. Madaniyat va san’at sohasidagi nufuzli xalqaro tanlovlarda 20 nafar, mamlakat miqyosidagi ko‘rik-tanlovlarda esa  56 nafar iste’dodli qizlarimiz g‘oliblikni qo‘lga kiritishdi. 

Ijtimoiy himoyaga muhtoj va ehtiyojmand 61 ming 537 nafar xotin-qizlarimiz “Ayollar daftari”ga kiritildi. O‘tgan yilda ularning har biri bilan manzilli ishlab, nogironligi bo‘lgan 17 ming nafardan ortiq ayollar va ularning 14 ming nafarga yaqin farzandlariga sanatoriy va shifoxonalarda tibbiy yordam ko‘rsatildi, salomatligi tiklandi. Boquvchisini yo‘qotgan 8 ming 423 nafar xotin-qizga moddiy yordam berildi. Yana 77 nafar ayolning uy-joy sharoitlari yaxshilandi. Qariyb 102 ming nafar xotin-qizlarning bandligi ta’minlandi. 1866 nafar xotin-qizlar tadbirkor sifatida davlat ro‘yxatidan o‘tkazildi. Biznesini boshlayotgan 643 nafar ayollarga zarur asbob-uskunalar sotib olish uchun 6 mlrd  so‘mdan ortiq subsidiyalar ajratildi.

Viloyatdagi kasbga o‘qitish markazlari orqali 21 ming 585 nafar xotin-qizlar mehnat bozorida talab yuqori bo‘lgan kasb-hunarlarga hamda tadbirkorlik ko‘nikmalariga o‘qitildi  va ularga malaka hujjati berildi. 

Shuningdek, uzoq muddatga yer ajratish hisobiga 61 ming nafar xotin-qizlarga dehqon xo‘jaligini tashkil etish imkoniyati yaratildi.Xotin-qizlarning salomatligi – har tomonlama sog‘lom va qudratli jamiyat poydevoridir.Shu maqsadda viloyatimizdagi 

14  ta tug‘ruq muassasasi eng zamonaviy tibbiy uskunalar bilan jihozlandi. Bundan tashqari, joriy yilda 162  ming 607 nafar xotin-qizlarda saraton kasalligini erta aniqlash maqsadida skrininglar o‘tkazildi.

Hozirgi vaqtda 1806 nafar xotin-qizlar ilmiy faoliyat bilan shug‘ullanayotgani, ilmiy ishlanmalarning 77 foizini olima ayollarimiz yaratayotgani ham, jamiyatda ularning o‘rni mustahkamlanib borayotganidan dalolat beradi.

Bahor va nafosat, go‘zallik va latofat bayramiga bag‘ishlangan tantana san’at ustalari, xushovoz estrada xonandalari konsert dasturi bilan yakunlandi. Qadrdon kuy-qo‘shiqlar, mumtoz raqslar bayram tadbiriga yanada shukuh va fayz bag‘ishladi.

Viloyat hokimligi matbuot xizmati