Buxoro viloyati hokimligi

Belgilangan vazifalar ijrosi doirasida mudofaa vazirligiga qarashli harbiy qismlarda ichki ishlar organlari profilaktik hisobida turuvchi, tarbiyasi og‘ir yoshlar uchun “Jasorat maktabi” harbiy-o‘quv loyihasi har chorakda bir marotaba o‘tkaziladi. Loyihada 18-30 yoshdagi jinoyat sodir etishga moyilligi bor, profilaktik hisobda turadigan tarbiyasi og‘ir yoshlar 5-10 kunlik o‘quvlarga jalb qilinadi.

Loyiha doirasida yoshlar harbiy qism yotoqxonalariga joylashtirilib, jangovar va sport, ma’naviy-ma’rifiy tayyorgarlikdan o‘tkaziladi. Shundan kelib chiqib, Buxoroda ham yoshlarni harbiy vatanparvarlik ruhida tarbiyalash hamda ularning bo‘sh vaqtlarini mazmunli tashkil etish orqali harbiy xizmatga qiziqtirish, kasb-hunar va tadbirkorlik sohasiga o‘qitishga alohida e’tibor qaratilyapti.

Buxoro shahrida joylashgan harbiy qismda viloyat hududlarida profilaktik hisobda turuvchi yoshlarni jalb qilgan holda tashkil etilgan “Jasorat maktabi” harbiy-o‘quv yig‘ini ana shunday amaliy tadbirlardan biri hisoblanadi. 

Yoshlar ishlari agentligi va ichki ishlar boshqarmalari hamkorligidagi mazkur loyiha yoshlar o‘rtasida vatanparvarlik tuyg‘ularini kuchaytirish, ularni sog‘lom turmush tarziga yo‘naltirish hamda harbiy xizmatga tayyorlash maqsadida tashkil etilgan. O‘quv yig‘inida viloyatning turli hududlaridan kelgan 80 nafardan ortiq yoshlar ishtirok etmoqda.

Harbiy-o‘quv yig‘inining ochilish marosimida viloyat hokimi, harbiy-ma’muriy sektor rahbari Botir Zaripov ishtirok etib, mazkur harbiy-vatanparvarlik yig‘ini uyushmagan yoshlarni ijtimoiy faolligini oshirishda, ma’naviyati va jismoniy tayyorgarligini mustahkamlashda muhim omil bo‘lishini ta’kidladi.

Yoshlarni vatanparvarlik ruhida tarbiyalash, hayotda o‘z o‘rnini topishi, kasb-hunar o‘rganishi, bandligini ta’minlash hamda yurtimiz kelajagi uchun daxldorlik hissini uyg‘otish maqsadida davlatimiz tomonidan yaratilayotgan imkoniyatlar haqida so‘z yuritdi.

— Dastur doirasida ishtirokchilarga harbiy tayyorgarlik asoslari, yurtimiz Qurolli Kuchlari faoliyati, fuqarolik va vatanparvarlik burchlari yuzasidan nazariy va amaliy mashg‘ulotlar o‘tkaziladi. Shuningdek, “Jasorat maktabi” loyihasining ishtirokchilari biznes reja tuzish va tadbirkorlik faoliyatini yuritish, kompyuterda ishlash, dastur tayyorlash, avtoelektrik, dvigatel hamda zamonaviy eshik-rom kabi yo‘nalishlarda dastlabki kasbiy yo‘nalishlarda o‘qitiladi, — deydi Yoshlar ishlari agentligi viloyat boshqarmasi boshlig‘i Shavkat Rahmonov. — Albatta, ushbu tadbirlar turli hududlardan kelgan uyushmagan yoshlarning ma’naviy va jismoniy uyg‘unlikda ulg‘ayishida muhim o‘rin tutadi.

Shuningdek, tadbir doirasida harbiylar, nuroniylar va yoshlar yetakchilari ishtirokida ma’naviy-ma’rifiy suhbatlar, sport musobaqalari hamda madaniy tadbirlar tashkil etilishi ko‘zda tutilgan.

Harbiy-o‘quv yig‘in doirasida “Rahbar va yoshlar uchrashuvi” ham o‘tkazildi. Uchrashuv davomida yoshlar o‘zlarini qiziqtirgan savollarni ochiq bayon etish imkoniyatiga ega bo‘ldilar. Ayrim masalalar shu joyning o‘zida hal etildi, qolganlari bo‘yicha esa mas’ul rahbarlarga aniq topshiriqlar berildi.

Viloyat hokimligi matbuot xizmati