Buxoro viloyati hokimligi

Ayniqsa, sport infratuzilmasini zamonaviy talablar asosida yangilash va kengaytirishga alohida e’tibor qaratilmoqda.

Bugun Buxoroda foydalanishga topshirilgan zamonaviy sport kurashlari markazi ham ana shu ezgu sa’y-harakatlarning amaliy natijasidir.

Yakkakurash sport turlariga ixtisoslashtirilgan sport maktabi hududida 3,5 mlrd. so‘mlik mablag‘lar evaziga barpo etilgan mazkur inshootda bir vaqtning o‘zida 100 nafardan ortiq yosh sportchining mashg‘ulot olib borishi uchun barcha shart-sharoitlar yaratilgan. 

Zamonaviy sport jihozlari, qulay kiyinish xonalari, sanitariya-gigiyena talablariga javob beradigan infratuzilma, murabbiylar uchun alohida xonalar — bularning barchasi yoshlarimizning yuqori saviyada tayyorgarlik ko‘rishiga, yil davomida sport bilan shug‘ullanish, nufuzli musobaqalar o‘tkazish, yuksak malakali sportchilarni tayyorlash va eng asosiysi yoshlarimizni ommaviy sport turlariga keng jalb etishga xizmat qiladi.

Markazning ochilishi munosabati bilan tantanali tadbir tashkil etildi. Unda viloyat va shahar hokimliklari, huquqni muhofaza qiluvchi idoralar mutasaddilari, sport sohasi faxriylari, jamoatchilik vakillari, nuroniylar va yoshlar ishtirok etdi. 

Tadbirda viloyat hokimi Botir Zaripov mamlakatda olib borilayotgan keng miqyosli islohotlarda sog‘lom va barkamol yosh avlodni tarbiyalash, jismoniy tarbiya va sportni rivojlantirishga alohida e’tibor qaratilayotganligini ta’kidladi. Zamonaviy sport kurashlari markazi ochilishi nafaqat sportchilarimiz, balki butun viloyatimiz ahli uchun katta bayram ekanligi e’tirof etildi.

-Ishonamanki, ana shu yangi sport zalida tarbiya topayotgan yoshlarimiz kelgusida respublika va xalqaro musobaqalarda viloyatimiz sharafini munosib himoya qiladi. Bu yerdan yurtimiz bayrog‘ini xalqaro arenalarda baland ko‘tarib chiqadigan chempionlar yetishib chiqadi,-dedi viloyat rahbari.

Tantanali tadbirda markaz qurilishida jonbozlik ko‘rsatgan muhandis-quruvchilar, shuningdek, hamkor tashkilotlarga minnatdorlik bildirilib, ehtirom ko‘rsatildi. 

Shu bilan birga, sport kurashlari bo‘yicha o‘tkazilgan nufuzli musobaqlarning g‘olib va sovrindorlariga pul mukofotlari topshirildi.

Viloyat hokimligi matbuot xizmati