Buxoro viloyati hokimligi

Sohada investisiya muhitini yaxshilash, xomashyo bazasini kengaytirish, ipak qurti urug‘i hajmini ko‘paytirish, pilla yetishtiruvchilarni qo‘llab-quvvatlash, yangi ishlab chiqarish quvvatlarini ishga tushirish orqali sohadagi bandlikni ikki barobarga oshirish, bozor mexanizmlarini jadallashtirish vazifalari belgilangan.

Hozirda respublikamizda pilla yetishtirish erkin shartnomaviy munosabatlar va ixtiyoriylik asosida tashkil etilgan. Pillachilik agronomlari mahalla faollari bilan kengashgan holda aholining band bo‘lmagan qatlamini pillachilik yo‘nalishiga jalb qilmoqda. Ushbu soha bilan shug‘ullangan fuqarolarga qator imtiyozlar berilayapti. Daromad solig‘idan ozod qilish, bir yillik mehnat stajlari berish, hosil oldidan bo‘naklar tarqatish shular jumlasidandir.

Buxoro tumanida tashkil etilgan seminarda qaror mazmun-mohiyati ishtirokchilarga keng tushuntirildi. 

Pilla — ona tabiat tomonidan in’om etilgan moʻjiza. Bir qaraganda, oddiy ishdek ko‘ringan yumushlar kishidan sabr-bardosh, halol va mashaqqali mehnatni, tabiiyki, xalqaro mezonlar asosida ishlashni talab etadi. Bu, o‘z navbatida, mashhur qo‘shiqda kuylanganidek, ipaklarni zarri tilloga aylantiradi.

Tadbirni kirish so‘zi bilan ochgan viloyat hokimining o‘rinbosari, oila va xotin-qizlar boshqarmasi boshlig‘i Hafiza Artikova sohada amalga oshirilayotgan islohotlar, ipakchilikning xotin-qizlar bandligini ta’minlashdagi o‘rni haqida to‘xtalib o‘tdi. 

Ta’kidlanganidek, bunday seminarlar ipakchilik va tutchilik sohasida zamonaviy yondashuvlarni keng joriy etish, aholining daromad manbalarini oshirish, ayniqsa xotin-qizlar bandligini ta’minlash hamda hudud iqtisodiy salohiyatini yuksaltirishda muhim ahamiyat kasb etadi.

Shundan so‘ng viloyat “Agro pilla” MCHJ rahbari Ilyos Temirov tomonidan hududda ipakchilik sohasida olib borilayotgan ishlar, yaratilayotgan imkoniyatlar va kelgusidagi rejalar haqida ma’lumot berildi. 

Mutaxassislar tomonidan ishtirokchilarga ipak qurti urug‘ini inkubatsiyaga qo‘yish, uni jonlantirish hamda kichik yosh davrida to‘g‘ri oziqlantirish bo‘yicha amaliy tavsiyalar berildi. Xususan, Toshkent davlat agrar universiteti professori Sobir Navro‘zov ipak qurti parvarishining ilmiy asoslari, samarali usullari hamda zamonaviy texnologiyalar haqida to‘xtaldi. Shuningdek, Ipakchilik ilmiy-tadqiqot instituti laboratoriya mudiri Safarali Hojimatov tomonidan bahorgi va takroriy mavsumda ipak qurti parvarishlashdagi muhim agrotexnik tadbirlar, kasalliklar va ularning profilaktikasi yuzasidan tavsiyalar berildi.

Seminar davomida tut plantatsiyalarini barpo etish, tut ko‘chatlarini ekish, payvandlash hamda mavjud tutzorlarni rekonstruksiya qilish usullari ham amaliy misollar asosida ko‘rsatib o‘tildi. Ishtirokchilar o‘zlarini qiziqtirgan savollarga mutaxassislardan atroflicha javob oldilar.

Ma’lumot uchun, joriy yilda viloyatimizda fermer xo‘jaliklari, kasanachilar bilan tuzilgan shartnomaga muvofiq 52 ming 388 quti ipak qurti parvarishlanib, 3,2 ming tonna sifatli “kumush tola” olish rejalashtirilgan. 

Viloyat hokimligi matbuot xizmati