Buxoro viloyati hokimligi

Prezidentimiz Shavkat Mirziyoyevning 2024 yil 1 iyun kuni mazkur hududga qilgan tashrifi bu jarayonlarga katta kuch va ruh bag‘ishladi. Bu tashrif bir paytning o‘zida ham xalq bilan muloqot, ham amaliy natijalar taqdimoti, ham kelajak taraqqiyotining strategiyasi bo‘ldi. 

Davlatimiz rahbari viloyat faollari bilan o‘tkazilgan uchrashuvida Gʻijduvon tumanini ijtimoiy-iqtisodiy rivojlantirish, tuman markazini arxitektura qiyofasini tubdan yangilash, aholining turmush sharoitini yaxshilash bo‘yicha qator vazifalar belgilangan edi.

Shunga ko‘ra, tumanni ijtimoiy-iqtisodiy rivojlantirish, aholining turmush darajasini ko‘tarish, ish o‘rinlarini ko‘paytirish, ijtimoiy sharoitlarni yaxshilash borasidagi ishlar jadallashdi. 

O‘zbekiston Respublikasi Prezidentining 2025 yil 1 apreldagi “Respublika hududlarini jadal kompleks rivojlantirish uchun tanlab olingan tuman(shahar)larda amaliy chora-tadbirlarni amalga oshirish to‘g‘risida”gi qaroriga muvofiq, mamlakatimiz bo‘ylab 16 ta shahar va tumanni kompleks rivojlantirish belgilanib, ularda ijtimoiy-iqtisodiy, muhandislik-kommunikatsiya, transport, turizm va xizmat ko‘rsatish sohalarida keng ko‘lamli loyihalarni amalga oshirish ko‘zda tutildi.

Mazkur hududlar qatorida tadbirkorlar va hunarmandlar yurti sifatida nom qozongan, boy tarixiy va madaniy merosga ega Buxoro viloyatining Gʻijduvon tumani ham bor. Qaror ijrosini ta’minlash doirasida tumanda 30 dan ortiq yirik va o‘rta loyihalar shakllantirilib, ayni paytda bunyodkorlik va obodonlashtirish ishlari jadal sur’atlarda amalga oshirilmoqda.

Shuningdek, Prezidentimizning 2025 yil 8 oktyabrdagi “Alohida tuman (shahar) va mahallalarni aholining yashashi va tadbirkorlik faoliyati bilan shug‘ullanishi uchun namunali hududga aylantirish chora-tadbirlari to‘g‘risida”gi qaroriga muvofiq joriy yil mamlakatimizda “Yangi O‘zbekiston qiyofasidagi tuman” maqomi berilib, tubdan rivojlanadigan 33 ta hudud safida Gʻijduvon tumani ham bor.

Tumanda mavjud xomashyo zaxiralaridan to‘liq foydalangan holda yuqori qo‘shilgan qiymatli mahsulotlar ishlab chiqarish yo‘lga qo‘yilib, sanoat kooperatsiyasi chuqurlashtiriladi. Sanoat zonalari quvvati kengaytirilib, sanoatning o‘sish sur’ati ta’minlanadi. 

Mulohazalarimizni “Fayzulla Xo‘jayev” mahalla fuqarolar yig‘ini hududida joylashgan erkin iqtisodiy zonada amalga oshirilayotgan yirik investisiya loyihalari misolida davom ettiramiz. 

Iqtisodiy zonada “Nazarbek Kelajak Nuri” MCHJ tomonidan qiymati 9 mlrd so‘mlik loyiha asosida poyabzal, PVX shlang va xo‘jalik mahsulotlari ishlab chiqarish yo‘lga qo‘yildi. Natijada 30 nafarga yaqin fuqarolar doimiy ish o‘rni bilan ta’minlandi. Korxonada yiliga 20 ming juft poyabzal va 300 tonnadan ortiq PVX mahsulotlari ishlab chiqarilib, ichki bozorga yetkazib berilmoqda.

 “Miranes Gʻijduvon” MCHJ tomonidan qiymati 5 mlrd so‘mlik loyiha doirasida chigitni qayta ishlash orqali sanoat moylari hamda yem mahsulotlari ishlab chiqarish yo‘lga qo‘yildi. Korxonada 15 nafardan ortiq ishchi-xodimlar bandligi ta’minlanib, yiliga 1500 tonnadan ortiq texnik va sanoat moylari ishlab chiqarilmoqda.

 “Ulug‘bek Farruxbek Grand” MCHJ tomonidan qiymati 8 mlrd so‘mlik karton qutilar ishlab chiqarish loyihasi amalga oshirildi. 20 nafardan ortiq fuqarolar ish bilan ta’minlandi, yiliga 1000 tonnadan ortiq tayyor karton qutilar respublikamiz bo‘ylab yetkazib berilmoqda.

 “Alp Kamol Fayz” MCHJ tomonidan qiymati 5 mlrd so‘mlik tikuvchilik syexi tashkil etilib, 40 nafarga yaqin xotin-qizlar doimiy daromad manbaiga ega bo‘ldi. Bu esa xotin-qizlar bandligini ta’minlash va ularning ijtimoiy faolligini oshirishda muhim qadam bo‘ldi.

  Gʻijduvonda amalga oshirilayotgan bunday yirik loyihalar — bu yangi ish o‘rinlari, aholi daromadlari oshishi va sanoat rivojining amaliy ifodasidir. Hududda yaratilayotgan imkoniyatlar Yangi O‘zbekiston taraqqiyot strategiyasining joylardagi yorqin natijasidir.

Viloyat hokimligi matbuot xizmati