Buxoro viloyati hokimligi

Bundan 8-10 yil oldin mamlakatimizda asalarichilik sohasi eʼtibordan chetda qolgan edi. Bugungi kunda mamlakatimizda ham mazkur sohaga alohida eʼtibor qaratilmoqda. Prezidentimizning 2017-yil 16-oktyabridagi “Respublikada asalarichilikni yanada rivojlantirish chora-tadbirlari toʻgʻrisida”gi qarori bilan inqirozga kelib qolgan soha qayta jonlandi. Eʼtiborlisi, bu sohada yirik tadbirkorlik subyektlari shakllandi. Qolaversa, sanoat usulida mahsulot yetishtirish yoʻlga qoʻyildi. Bundan tashqari, mamlakatimizda asalari boqish istagini bildirayotgan fuqarolar koʻpaymoqda.

Shofirkon tumanining Iskogare mahallasi bugun nafaqat oʻzining fayzli koʻchalari, balki tadbirkor va mehnatkash aholisi bilan ham tilda tushgan. Ayniqsa, ushbu mahalladagi bir koʻcha borki, uni el orasida “Asalarichilar koʻchasi” deb atashadi. Bu yerda 10 dan ortiq xonadon asalarichilikni oilaviy tadbirkorlikka aylantirib, ham barakali daromad topmoqda, ham aholi dasturxonini shifobaxsh asal bilan toʻldirmoqda.

Mahallaning koʻzga koʻringan tadbirkorlaridan biri Zebo Hamidova va uning turmush oʻrtogʻi Bekjon Husenovlar. Bu oila 2020 yildan buyon asalarichilik bilan jiddiy shugʻullanib keladi.

Ularning xonadonida 100 quti asalari oilasi mavjud boʻlib, yiliga 1-1,5 tonna sof asal yetishtiriladi, yillik daromad esa 100 million soʻmdan ortiqni tashkil etmoqda.

Ushbu koʻchadagi yana bir fayzli xonadon egalari — Baxtigul Oʻrinova va uning turmush oʻrtogʻi Akmal Baronov. Ular bu sohada ancha tajribali boʻlib, oʻz faoliyatini 2014 yilda boshlagan.

7 quti asalari oilasi bilan faoliyatini boshlagan ushbu oila hozirgi kunda  150 ta oilaga yetkazgan boʻlib, oʻrtacha 2 tonnadan ortiq asal olinadi. Daromad esa yiliga qariyb 180 mlnga teng . 

Dilovar Qoʻldosheva va turmush oʻrtogʻi Kamol Mirzoyevlar ham bugun asalarichilik orqasidan roʻzgʻor tebratayotgan namunali oilalardan. Hozirgi kunda 42 quti asalari oilasi mavjud boʻlib, yiliga 650 kg shifobaxsh asal olinmoqda.

Iskogarelik bu tadbirkorlarning eng eʼtiborli jihati shundaki, ular nafaqat oʻz foydasini koʻzlaydi, balki asalarichilik sirlarini qoʻni-qoʻshnilariga ham bajonidil oʻrgatmoqda. Bu esa qishloqda yangi ish oʻrinlari va qoʻshimcha daromad manbalari yaratilishiga xizmat qilmoqda. Eʼtiborlisi, asalga xaridor ham mavjud boʻlib, ular ishlab chiqarish va pishiriq tayyorlash korxonalariga  yetkazib beriladi. 

Bugun “Iskogare” mahallasida yashovchi bu oilalarni hamma birdek taniydi va hurmat qiladi. Ularning halol mehnati evaziga ushbu koʻcha haqiqatan ham “Asalarichilar koʻchasi” degan nomga munosib ekanini isbotladi.

Viloyat hokimligi matbuot xizmati