Bosh vazir oʻrinbosari – Oila va xotin-qizlar qoʻmitasi raisi Zulayho Mahkamova Shofirkon va Vobkent tumanlarida boʻldi
2026-02-17 20:05:00 / Yangiliklar
Oʻrganish manzili dastlab Shofirkon tumanining chekka hududlaridan biri — "Doʻrman" mahalla fuqarolar yigʻinidan boshlandi. Bu yerda tadbirkor ayollar tomonidan tashkil etilgan "Nozanin kelajak avlodi" nodavlat maktabgacha taʼlim tashkiloti (NMTT) faoliyati mehmonlar eʼtiborida boʻldi.
Mazkur taʼlim maskani nafaqat bogʻcha, balki chinakam maʼnaviyat va tarbiya oʻchogʻiga aylangan boʻlib, loyiha qiymati 2 milliard 56 million soʻmni tashkil etadi.
100 nafardan ortiq bolajonlarni qamrab olish imkoniyati ega taʼlim maskani, hozirgi holatda 60 nafardan ortiq tarbiyalanuvchilar taʼlim-tarbiya olmoqda.
Ushbu muassasaning oʻziga xos jihati shundaki, bu yerda Oʻzbekiston Respublikasi Prezidenti huzuridagi Ijtimoiy himoya milliy agentligi bilan davlat-xususiy sherikchilik asosida "Kunduzgi parvarishlash xizmati" yoʻlga qoʻyilgan. Hozirda 20 nafarga yaqin alohida ehtiyojli bolajonlar ushbu xizmatdan foydalanmoqda.
Muassasa masʼuli, logoped-defektolog Mohinur Qurbonova mehmonlarga markazdagi oʻquv jarayonlari haqida soʻzlab berdi.
Tadbir davomida soʻzga chiqqan onalar yaratilgan bu imkoniyatlardan mamnun ekanliklarini bildirishdi. Ayniqsa, chekka qishloq sharoitida bunday ixtisoslashgan xizmatlarning mavjudligi bolalarning rivojlanishida katta ijobiy oʻzgarishlar yasayotganini taʼkidladilar.
Tashrif dasturi asosida Vobkent tumanida ham bir qator tadbirlar tashkil etildi.
Dastur “Kumushkent ipagi” MCHJda pilladan ipak tolasi va momigʻi ishlab chiqarish faoliyati hamda pillachilik oʻquvi jarayoni bilan tanishishdan boshlandi. Tadbirkor Shabon Hojiyevning bildirishicha, oʻtgan yili mahsulotning 100 foizi xorijga, Janubiy Koreya, Xitoy, Hindiston va Fransiya davlatlariga eksport qilingan va chet ellik buyurtmachilarga 1,4 million AQSH dollari miqdoridagi mahsulot yetkazilgan. Taʼkidlash joizki, “Kumushkent ipagi”da 90 taga yaqin doimiy ish oʻrni yaratilgan. Korxona har yili ming nafarga yaqin kishini mavsumiy ishga jalb etayotgani ham daromadsiz oilalar uchun bir imkoniyat. Korxonaga ishga jalb etilgan jamoaning aksar qismini xotin-qizlar tashkil etadi. Korxonani xom ashyo bilan taʼminlashda esa ipak qurtini 3 mavsum davomida boqish yoʻlga qoʻyilgan.
Shundan soʻng bosh vaziri oʻrinbosari Vobkent tumani hokimligi binosida tadbirkor ayollar bilan muloqot oʻtkazdi. Uchrashuvda tadbirkor ayollar, mahalla faollari, masʼul tashkilotlar rahbarlari ishtirok etdi. Tadbirkorlarning faoliyatini samarali yoʻlga qoʻyishda uchrayotgan muammolarning aksariyati joyida bartaraf etildi. Mablagʻ va vaqt talab etadigan muammolarni yechish boʻyicha bajarilishi lozim boʻlgan aniq vazifalar, bajarilish muddati koʻrsatilgan holda masʼul ijrochilar belgilab olindi. Xotin-qizlarni siyosiy, ijtimoiy, iqtisodiy faolligini oshirishda namuna koʻrsatayotgan tadbirkorlar tashakkurnoma va esdalik sovgʻalari bilan taqdirlandi.
Shuningdek, sayyor qabul oʻtkazilib, unda xotin-qizlarning muammolari tinglandi. Qabulda ishtirok etgan murojaatchilarning muammolari tegishliligi boʻyicha masʼul idora rahbarlari bilan bamaslahat hal etish choralari koʻrildi.
Shundan soʻng Zulayho Mahkamova viloyat hokimi Botir Zaripov hamrohligida “SHIRIN ETHNO HOUSE” oilaviy korxonasi tomonidan tashkil qilingan turizm maskani hamda “Daromadli ayol” loyihasi asosida yoʻlga qoʻyilgan kasanachilik faoliyati bilan tanishdi.
Shirin qishlogʻi oʻziga xosligi, tarixiy anʼana va qadriyatlari, mahalliy urf-odatlari bilan etnoturizm qishlogʻi sifatida rivojlantirilmoqda. Qishloqda shoʻrdanak bilan birga quruq mevalar, milliy shirinliklar, poliz ekinlari va hunarmandchilik mahsulotlarini tayyorlash avloddan-avlodga oʻtib kelayotgan meros sanaladi. Qishloq hunarmand chevar ayollari bu mahsulotlarni tayyorlashda har bir koʻchadan bitta xonadonga yigʻilishib, qadimgi anʼanalar, milliy kuy-qoʻshiqlarni ijro etishib, laparxonlik, qadimgi rivoyatlardan oʻqib mehnat qilishni odatga aylantirishgan.
Bunda bir nechta oʻtovlar tayyorlangan boʻlib, bir tomonda alohida suv havzasi tayyorlanib, bir yoqda alohida ogʻilxona qurib, unda sigir-buzoq, qoʻy-echki, tovuq, oʻrdak, kurka kabi parranda yoki quyon parvarishi olib borilayotgani ham mehmonlar qiziqishi va hayratini oshirishi tabiiy.
Mehmonlarga turizm qishlogʻida yoʻlga qoʻyilgan tadbirkorlik faoliyati, hunarmandchilik bilan shugʻullanayotgan xotin-qizlarga yaratilgan shart-sharoitlar haqida soʻzlab berildi.
Viloyat hokimligi matbuot xizmati