Buxoro viloyati hokimligi

Ushbu qaror doirasida Buxoro tumanidagi “Oybek” mahallasining “Yorjon” qishlogʻiga “Turizm qishlogʻi” maqomini berish rejalashtirilmoqda.

Shunga koʻra, qishloqda turizmni rivojlantirish boʻyicha istiqbolli loyihalar amalga oshirilmoqda. Buning uchun infratuzilmani modernizatsiya qilish va yoʻl-transport tizimini yaxshilash, mahalliy aholining xizmat koʻrsatish sohasidagi malakasini oshirish, milliy hunarmandchilik va mahalliy mahsulotlar ishlab chiqarishni qoʻllab-quvvatlash, ekologik, etno va agro-turizm yoʻnalishlarini yoʻlga qoʻyish, shuningdek, oilaviy mehmon uylari hamda servis xizmatlarini kengaytirish choralari koʻrilmoqda. 

Shuningdek, mutaxassislar tomonidan “Yorjon” qishlogʻining tarixiy, tabiiy va madaniy jihatdan oʻziga xos turistik markazga aylanishi uchun amaliy tavsiyalar ishlab chiqilgan. Xususan, hududda sayyohlik xizmatlarini rivojlantirish, oilaviy tadbirkorlikni qoʻllab-quvvatlash, xizmatlar sifatini oshirish va brend qishloq konsepsiyasini shakllantirish boʻyicha takliflar bildirilyapti.

Mazkur tashabbus amalga oshgach, “Yorjon” qishlogʻi Buxoro viloyatining yangi sayyohlik maskanlaridan biriga aylanib, nafaqat mahalliy aholi bandligini taʼminlaydi, balki xorijiy sayyohlar uchun ham milliy qadriyatlarimizni oʻzida mujassam etgan manzil sifatida tanilishi kutilmoqda.

Viloyat hokimligi matbuot xizmati