Buxoro viloyati hokimligi

Qayd etish lozimki, bugungi kunda chorvachilikda arzon, sifatli va toʻyimli ozuqa tayyorlash dolzarb masala boʻlib, bu borada gidroponika texnologiyasi yuqori samaradorlik koʻrsatmoqda.

“Chovdur” mahalla fuqarolar yigʻinidagi kichik chorvachilik xoʻjaligida ham yuqoridagi omillar asosida nasldor tuyoq sonini koʻpaytirishga eʼtibor qartilmoqda. Mazkur kompleks tadbirkor Rustam Samandarov tomonidan tashkil etilgan boʻlib, ayni paytda bu yerda Qirgʻiziston respublikasidan keltirilgan “Arashan” zotiga mansub 100 boshdan ortiq qoʻy parvarishlanmoqda.
 
Ushbu zotning jaydari, duragay, arabi yoki qazoqi qoʻylardan afzal  jihatlari shundaki, bu turdagi qoʻylar ikki yil davomida 3 marotaba qoʻzilaydi. Bir bosh qoʻzining 3 oylik bahosi oʻrtacha 4–5 million soʻmni tashkil etayotgani  chorvador uchun yuqori daromad manbai, albatta.  
 
Rustam Samandarovning qoʻyxonasida nasldor qoʻylar talab darajasida,  tejamkor usulda oziqlantirilmoqda. Xususan, gidroponika texnologiyasi asosida bugʻdoy va boshqa boshoqli dondan ekib, ivitib tayyorlanayotgan shirali ozuqalar qoʻylar sogʻlom oʻsishiga ijobiy taʼsirini koʻrsatmoqda. Har bir bosh qoʻy kuniga oʻrtacha 3 kilogramm gidroponika usulida yetishtirilgan maysa isteʼmol qiladi. Shuningdek, qoʻshimcha ravishda 500 gramm somon xashagi hamda 500 gramm boshoqli donlardan tayyorlangan granulali omuxta yem beriladi. Umumiy hisobda bir bosh qoʻyni kunlik oziqlantirish xarajati oʻrtacha 3,5 ming  soʻmni tashkil etadi.
 
Gidroponika usulining yana bir muhim jihati — uning yuqori samaradorligidir. Masalan, 2 kilogramm bugʻdoydan gidroponika texnologiyasi yordamida 12 kilogramm shirali maysa yetishtirish mumkin. Umuman, har bir  kilogramm boshoqli don 6 kilogramgacha ozuqaviy qiymatga ega boʻlgan “yashil ozuqa”ga aylantiriladi.
 
Gidroponika bu undirilgan don mahsuloti boʻlib, uni tayyorlash uchun maxsus jihozlangan xona va zamonaviy uskunalardan foydalanilmoqda. Bu jarayon toʻliq biologik asosga ega boʻlib, chorva uchun zarur boʻlgan vitaminlar, minerallar va ozuqa moddalariga boy hisoblanadi.
 
Mazkur usul sut va goʻsht yoʻnalishidagi chorva mollari uchun ayni muddao boʻlib, ozuqa sarf-xarajatlarini kamaytirish, mahsuldorlikni oshirish va chorvachilikda barqaror daromadga erishishda muhim ahamiyatga ega.

Viloyat hokimligi matbuot xizmati