Buxoro viloyati hokimligi

Oila va xotin-qizlar boshqarmasi tashabbusi bilan oʻtkazilgan anjumanda viloyatimizda ilm-fan, taʼlim va innovatsiyalar rivojiga munosib hissa qoʻshib kelayotgan yetuk olima ayollar, ilmiy tadqiqotchilar, professor-oʻqituvchilar hamda yosh izlanuvchilar jam boʻldilar.

Tadbirda soʻzga chiqaanlar tomonidan Yangi Oʻzbekiston taraqqiyot strategiyasi doirasida ilm-fan sohasini rivojlantirish, raqobatbardosh kadrlar tayyorlash, yoshlarning intellektual salohiyatini yuksaltirish, jamiyatda ilmiy tafakkur va maʼnaviy-maʼrifiy muhitni mustahkamlashda xotin-qizlarning oʻrni beqiyos ekanligi alohida taʼkidlandi.

Eʼtirof etilganidek, mamlakatimizda xotin-qizlarini qoʻllab-quvvatlash, ularga yaratib berilayotgan sharoit va imkoniyatlar samarasi oʻlaroq xotin-qizlarning barcha jabhalarda, shu jumladan, ilm-fandagi faolligi va tashabbuslari yil sayin sezilarli oʻsib bormoqda. Viloyatimiz boʻyicha ayni paytda 260 dan ziyod xotin-qizlar rahbarlik lavozimlariga zahiraga olingan, 60 nafar xotin-qizlar rahbarlik lavozimlariga tavsiya etilgan, shundan 20 ga yaqin xotin-qizlarimiz rahbarlik lavozimlariga tayinlangan. 

Viloyatimizda 1 nafar senator, davlat oliy taʼlimda 1 nafar rektor, 3 nafar prorektor ayollarimiz bor. Davlat OTMlarda 60 ga yaqin professorlar ayollar, 200 dan ortiq dotsentlar, 450 ga yaqin fan nomzodlari, yana yuzlab fan doktorlari faoliyat yuritishmoqda. 
Bugun viloyatimizda iqtidorli qizlar soni ham mingdan oshdi. Yaqindagina oliy taʼlim tashkilotlari bakalavriat bosqichining 2 nafar talaba qizlari Oʻzbekiston Respublikasi Prezidenti davlat stipendiyasiga sazovor boʻlishdi. Shuningdek, 10 nafar qizlarimiz Alisher Navoiy, 4 nafari Islom Karimov, 7 nafari Beruniy, 1 nafari Ibn Sino, 1 nafari Ulugʻbek hamda 2 nafari Bobur nomidagi davlat stipendiyasiga sazovor boʻlishdi.

34 nafar Zulfiya nomidagi Davlat mukofotiga sazovor boʻlgan qizlarimiz orasida 2 nafar professor, 2 nafar dotsent, 1 nafar Oliy Majlis Qonunchilik palatasi deputati, 2 nafar tayanch doktoranturada tahsil olayotgan xotin-qizlar bor. 

Anjuman yakunida ilm-fan rivoji, ilmiy izlanishlar samaradorligini oshirish, taʼlim sifatini yuksaltirish hamda jamiyatda maʼrifat va innovatsion gʻoyalarni keng targʻib etish borasidagi samarali faoliyati uchun bir guruh olima ayollar taqdirlandilar.

Mazkur anjuman ilm-fan sohasida faoliyat olib borayotgan xotin-qizlarning jamiyat hayotidagi oʻrni va nufuzini yanada oshirish, ularni qoʻllab-quvvatlash, yosh avlodni ilmga yoʻnaltirish yoʻlidagi muhim qadam boʻldi.

Viloyat hokimligi matbuot xizmati