Buxoro viloyati hokimligi

Mamlakatimizda taʼlim tizimini kompleks rivojlantirish, ayniqsa maktabgacha taʼlim sohasini mustahkamlash davlat siyosatining ustuvor yoʻnalishlaridan biri boʻlib, bu borada katta kuch va mablagʻlar safarbar etilmoqda.

Xususan, 2025 yilda tumanda 6 ta bogʻcha mukammal taʼmirlanib, 4 tasi yangidan qurildi.

2026 yilda esa yana 7 ta davlat maktabgacha taʼlim tashkilotini mukammal taʼmirlash, 3 ta yangi bogʻcha qurish rejalashtirilgan.

Bugun esa “Tashabbusli byudjet” dasturi doirasida 5-davlat maktabgacha taʼlim tashkiloti mukammal taʼmirlanib, foydalanishga topshirildi. Sifatli taʼlim va tarbiya olish uchun barcha sharoit muhayyo qilingan muassasa hududdagi 180 nafar jajji bolajon uchun oʻz eshiklarini qaytadan ochdi.
Oʻtgan davr mobaynida koʻzga koʻrinarli taʼmirlash ishlari olib borilmagan maskanda munosib va zamonaviy shart-sharoitlarni yaratish boʻyicha loyiha doirasida ilgari surilgan tashabbus 2 mingtadan koʻp ovoz toʻpladi. Prezidentimizning qarori asosida ushbu taklifni roʻyobga chiqarish uchun esa davlat byudjetidan 1 milliard 200 million soʻm mablagʻ yoʻnaltirildi.

Natijada eski bogʻcha binosi mukammal taʼmirlanib, yangi va zamonaviy koʻrinishga keltirildi. 

Maktabgacha taʼlim tashkilotining ochilish marosimida tuman hokimi Akmal Ostonov hududlarning ijtimoiy-iqtisodiy rivojlanishida “Tashabbusli byudjet” kabi dasturlarning ahamiyati bilan birgalikda yurtimizda yosh avlodning jismonan sogʻlom, maʼnan yetuk insonlar boʻlib ulgʻayishi, zamonaviy bilim hamda kasb-hunarlarni puxta egallashi uchun yaratilayotgan shart-sharoitlar haqida gapirib oʻtdi. Ayni dastur natijasida roʻy bergan ijobiy oʻzgarishlar alohida qayd etib oʻtildi. 

Viloyat hokimligi matbuot xizmati