Buxoro viloyati hokimligi

Yurtimizda chorvachilikni rivojlantirish, bu borada tadbirkorlikni yoʻlga qoʻyishga ustuvor ahamiyat qaratilayotgani, zotli chorva mollarini xarid qilish, ularni koʻpaytirish va bu orqali aholining arzon, sifatli goʻsht va sut mahsulotlariga boʻlgan ehtiyojini taʼminlashga keng yoʻl ochilgani buxorolik chorvadorlarga qoʻl kelmoqda. Ayni shu sohada faoliyat olib borayotgan korxonalarni qoʻllab-quvvatlash, ularda ozuqa bazasini koʻpaytirish, naslchilikni yaxshilash, moddiy-texnika bazasini mustahkamlashni davlatimiz rahbarining shaxsan oʻzi kechiktirib boʻlmas vazifa sifatida belgilayotgani chorvaga mehr qoʻygan buxoroliklarning qiziqishini yanada oshirishga xizmat qilmoqda.

Viloyatda chorvachilik tarmogʻini ravnaq toptirishga qaratilgan koʻplab istiqbolli loyihalar amalga oshirilmoqda. Yuzlab chorvachilik komplekslari paydo boʻldi. Bu loyihalar xalqimizni arzon, sifatli goʻsht va boshqa oziq-ovqat mahsulotlari bilan taʼminlash, ayniqsa, qishloq joylarida istiqomat qilayotgan fuqarolarning bandligini oshirish hamda daromadlarini koʻpaytirishga xizmat qilayotgani bilan ahamiyatlidir.

Misol uchun, Peshku tumanining “Valfajir” mahalla fuqarolar yigʻinida yashovchi Oybekjon Xayrullayev naslchilik hamda goʻsht yoʻnalishida tadbirkorlik faoliyatini olib borilmoqda. 

U bu loyihani amalga oshirish uchun 500 mln soʻm mablagʻ sarfladi. Bu mablagʻlar nasldor qoʻylar xaridi, ozuqa bazasini mustahkamlash, parvarish sharoitlarini yaxshilash hamda veterinariya tadbirlarini amalga oshirishga yoʻnaltirilgan.

Hozirgi kunda  Oybekjon Xayrullayev rahbarlik qilayotgan xoʻjalikda 100 boshdan ziyod qoʻy mavjud boʻlib, shundan, 50 bosh “Arashan” zotli qoʻylar, 50 bosh Tojikistonning Hisor nasliga mansub qoʻylarni tashkil etadi. Bugun ular ham koʻpayib, oʻz-oʻzidan yangi ish oʻrinlari vujudga kelgan. Hozirda ushbu xoʻjalikda 4 nafar fuqaro doimiy ish bilan taʼminlangan boʻlib, ular chorvani parvarishlash va xoʻjalik ishlariga jalb etilgan.

– Issiq choʻl sharoitida bu kabi zotli qoʻylarni parvarishlaymiz deganimizda, koʻpchilik ertak aytma deyishgan, – deydi Oybekjon Xayrullayev . – Lekin maqsadimizda qatʼiy turib loyihamizni amalga oshirdik. Naslli qoʻylarni boqish uchun yetarlicha shart-sharoitlarni tashkil qildik. Kelgusidagi rejalarimiz yanada ulkan.

Darhaqiqat, Peshkuda mamlakatimizda yaratilgan imkoniyatlardan unumli foydalangan holda chorvaning sonini oshirish, mahsuldorlik sifatini yaxshilash, naslchilik resurslarini yaratish, saqlash boʻyicha keng koʻlamli ishlar amalga oshirilmoqda. Bundan koʻzlangan maqsad nafaqat viloyat aholisining oziq-ovqat mahsulotlariga boʻlgan ehtiyojini qondirish, balki chorvachilik mahsulotlari eksportini yanada oshirishdir.

Viloyat hokimligi matbuot xizmati