Buxoro viloyati hokimligi

Shu munosabat bilan davlatimiz rahbari yoshlarni harbiy-vatanparvarlik ruhida tarbiyalash tizimini qayta koʻrib chiqish yuzasidan tegishli mutasaddilarga aniq topshiriqlar berdi. Navqiron avlod vakillarining yurtimizdagi islohotlar jarayonidagi ishtirokini oshirish, ular oʻz intellektual va ijodiy salohiyatini roʻyobga chiqarishi uchun sharoitlar yaratish muhimligiga eʼtibor qaratdi.

Yigʻilishda belgilangan topshiriqlar ijrosini taʼminlash maqsadida bugun viloyat hokimi, harbiy-maʼmuriy sektor rahbari Botir Zaripov Buxoro davlat pedagogika institutining harbiy ta'lim fakultetida boʻlib, “Rahbar va yoshlar” uchrashuvida ishtirok etdi. 

Muloqotda huquqni muhofaza qiluvchi idoralar, korxona va tashkilotlar rahbarlari ham qatnashishdi.  

Viloyat rahbari yoshlarga oid davlat siyosati ijrosi doirasida amalga oshirilayotgan keng qamrovli ishlar xususida toʻxtalib, tadbir ishtirokchilarini rasmiyatchilikdan xoli boʻlish, ochiq va oshkora muloqot qilishga chaqirdi.

Shundan kelib chiqib, uchrashuv davomida 250 nafardan ortiq talaba-yoshlar harbiy sohaga oid  qiziqishlari, taklif va muammolari yuzasidan viloyat hokimi bilan bevosita muloqot qilishdilar. Yoshlar tomonidan bildirilgan masalalar atroflicha muhokama qilinib, ularni hal etish boʻyicha tegishli vazifalar belgilandi.

Shuningdek, uchrashuv doirasida yoshlarga yaratilgan imkoniyatlar, Harbiy fakultetda mavjud oʻquv va moddiy-texnik sharoitlar bilan yaqindan tanishildi.

Mazkur uchrashuv yoshlarning harbiy sohaga boʻlgan qiziqishini yanada oshirish, ularning muammolarini joyida hal etish hamda vatanparvar, malakali kadrlarni tayyorlash yoʻlidagi muhim qadam boʻldi.

Viloyat hokimligi matbuot xizmati