Buxoro viloyati hokimligi

Xususan, tashabbuskor tadbirkorlar tomonidan 2023-2025-yillarda Xitoy davlatida ishlab chiqarilgan, har tomonlama qulay va shinam boʻlgan zamon talablariga javob beradigan 116 ta yangi avtobus, 45 ta mikroavtobus olib kelindi. 

Mazkur ishlarning uzviy davomi sifatida joriy yilda Buxoro shahrida jamoat transportini rivojlantirish va tirbandliklarni qisqartirish maqsadida shaharning “Transport va yoʻl-transport infratuzilmasini rivojlantirish” bosh rejasi ishlab chiqildi. Bosh rejaga muvofiq, Buxoro shahrida 21 ta yangi avtobus yoʻnalishi joriy etilib, aholi gavjum boʻlgan hududlarda transport oʻtish bogʻlamalari quriladi, 113 ta chorrahada “Aqlli svetofor” tizimi qoʻllaniladi. Shuningdek, avtobuslar harakatiga ustuvorlik berish maqsadida Buxoro shahrining 7 ta markaziy, yaʼni “Muhammad Iqbol”, “Ibn Sino”, “Islom Karimov”, “Mirdoʻstim”, “Gʻijduvon”,  “Bahouddin Naqshband” va “Mustaqillik” koʻchalarida alohida avtobus yoʻlaklari tashkil etilmoqda.

-Ilgari koʻp hollarda kechki vaqtda yoʻlovchilar siyraklashganidan soʻng, yoʻnalishlarda avtobuslarni topish qiyin boʻlardi. Aholiga sifatli jamoat transporti xizmatini koʻrsatish maqsadida jamoat transporti  faoliyatida “Brutto-shartnoma” tizimi joriy qilindi. Bu tizimda haydovchilar oldingi kunlik belgilangan pul tushumi uchun javobgar boʻlmaydi. Aksincha, tashuvchi korxonalar tomonidan belgilangan grafik va masofa uchun qatnovlarning amalga oshirilganligi, yaʼni avtobuslar bosib oʻtgan yoʻli va koʻrsatgan xizmatlari sifati uchun haq toʻlash mexanizmi yoʻlga qoʻyildi. Hozirda brutto yoʻnalishlarimiz 7 taga yetib, 84 ta yangi avtobus bu tizim orqali xalqimizga beminnat xizmat koʻrsatmoqda. Fevral oyidan boshlab brutto yoʻnalishlarida yoʻl kira naqd pulsiz toʻlash tizimini ham ishga tushirdik. Bunda tashuvchi korxonalarga brutto shartnoma asosida qatnovlarni bajarganligi uchun davlat byudjetidan jami 33,6 mlrd soʻm mablagʻ toʻlab berildi,-deydi viloyat transport boshqarmasi boshligʻi Faxriddin Rajabov. 

Hududlarda aholiga koʻrsatilayotgan transport xizmatlari sifatini yaxshilash maqsadida zamonaviy harakat tarkiblari (yangi avtobuslarni) olib kelish ishlari davom etmoqda. Xususan, bugun “Bux Pit Stop ” korxonasi tomonidan yana 25 ta zamonaviy avtobus olib kelindi. 

Ushbu avtobuslar ham yoʻlovchilar uchun qator qulayliklarga ega. Ular “Yevro-5” standarti talablariga toʻliq javob beradi hamda tabiiy siqilgan gazda harakatlanadi. Har biri 30 nafar yoʻlovchini qulay sharoitlarda manziliga yetkazishga moʻljallangan ushbu avtobuslar past polli boʻlib, nogironligi boʻlgan shaxslarning harakatlanishi uchun maxsus pandus uskunalari va alohida oʻrindiqlar bilan jihozlangan. Yoʻl haqi toʻlovlarini elektron tarzda ham amalga oshirish uchun “ATTO” tizimi oʻrnatilgan. Avtobus saloni toʻliq kuzatuv kameralari bilan taʼminlangan. Eng asosiysi, avtobus salonida yil davomida sifatli xizmat koʻrsatish uchun isitish va sovutish tizimlari ham mavjud. Shuningdek, avtobus ichidagi yoʻlovchilarni sonini aniqlash tizimi yoʻlga qoʻyilgan.

Yuqori darajadagi qulayliklarga ega boʻlgan zamonaviy avtobuslar jamoat transporti yetib bormagan nuqtalarni oʻzaro bogʻlash uchun xizmat qilib, tender natijalariga koʻra 13-sonli “Madaniyat” bosh bekati – “Toʻqimachi” bosh bekati va 15- sonli “Markaziy dehqon bozori” bosh bekati – “Gʻurbincha” yoʻnalishlarida brutto asosida qatnovlarni amalga oshirib, yoʻlovchilarga transport xizmati koʻrsatishni boshlaydi. Shu orqali Buxoro shahrida jamoat transportining sifat jihatidan yanada yaxshilanishiga erishiladi.

Bugun viloyat hokimi Botir Zaripov jamoat transporti infratuzilmasini takomillashtirish maqsadida olib kelingan zamonaviy avtobuslar taqdimoti bilan tanishdi.

Taqdimotda taʼkidlanganidek, mart oyi yakuniga qadar Buxoroga yana 60 ta ana shunday avtobuslar olib kelinadi. Xususan, “Yutong” kompaniyasi bilan hamkorlik doirasida shahar tipiga moslashtirilgan katta hajmdagi 12 dona avtobus xarid qilish boʻyicha shartnoma imzolangan. Hozirda bu avtobuslar ham yetkazib berish jarayonida. Umuman, yil yakunigacha yangi olib kelinayotgan jamoat transportlari soni 100 tadan oshiriladi. Ushbu avobuslarning barchasi yoʻnalishlarda brutto-shartnoma asosida aholiga xizmat koʻrsatadi.

Viloyat hokimligi matbuot xizmati