“Salomatlik marafoni”: Shofirkon tumanida keng qamrovli tibbiy ko‘riklar o‘tkazildi
2026-02-04 18:10:00 / Yangiliklar
Mazkur tadbir doirasida Shofirkon tuman tibbiyot birlashmasi tomonidan oldindan ishlab chiqilgan reja asosida zarur tashkiliy va amaliy chora-tadbirlar amalga oshirildi.
Tadbirining ochilish marosimida Shofirkon tuman tibbiyot birlashmasi rahbari Furqat Tohirov, Shofirkon tuman hokimi o‘rinbosari Akmal Qozoqov so‘zga chiqib, aholi salomatligini muhofaza qilish, kasalliklarni barvaqt aniqlash va ularning og‘ir asoratlarini oldini olishda profilaktik tibbiy ko‘riklarning muhim ahamiyatga ega ekanini alohida ta’kidladilar. Tadbirga rasman start berilib, tibbiy xizmatlar aholiga yaqinlashtirilgani qayd etildi.
Tadbir jarayoniga Shofirkon tuman tibbiyot birlashmasining malakali mutaxassis shifokorlari, o‘rta tibbiyot xodimlari hamda maxsus tibbiy brigadalar jalb qilindi. Tibbiy ko‘riklar zamonaviy talablarga mos, aholiga qulay sharoitda va ochiq formatda o‘tkazilishi ta’minlandi.
Tadbir doirasida tuman hududidagi mahalla fuqarolar yig‘inlarida istiqomat qiluvchi aholi ommaviy ravishda tibbiy ko‘rik va profilaktik skrining tekshiruvlaridan o‘tkazildi.
Xususan:
2–10 yoshdagi 458 nafar bola parazitologik tekshiruvdan o‘tkazilib, 18 nafarida aniqlangan kasalliklar bo‘yicha zarur davolash choralari ko‘rildi;
3–18 yoshdagi 687 nafar bolada onkogematologik laborator tahlillar o‘tkazilib, 164 nafar bolada kamqonlik aniqlanib, ularga tegishli davolash va sog‘lomlashtirish choralari belgilandi;
40 yoshdan oshgan 1 569 nafar fuqaro yurak-qon tomir va qandli diabet kasalliklari bo‘yicha skriningdan o‘tkazilib, 67 nafar fuqaroda ushbu kasalliklar ilk bosqichda aniqlanib, nazorat va davolashga olindi;
Xavf guruhiga kiruvchi 478 nafar bemor ko‘krak qafasi rentgenologik tekshiruvlaridan o‘tkazilib, 28 nafar fuqaro pульmonolog shifokor ko‘rigiga yo‘naltirildi.
Shuningdek, tadbir davomida aholi o‘rtasida kasalliklarni erta aniqlashning ahamiyati, profilaktika choralarini kuchaytirish, sog‘lom turmush tarziga amal qilish, tibbiy madaniyatni oshirish hamda kasallik alomatlari paydo bo‘lganda o‘z vaqtida shifokorga murojaat qilish bo‘yicha keng qamrovli tushuntirish va ma’rifiy ishlar olib borildi.
Ma’lumotlarga ko‘ra, “Salomatlik marafoni” tadbiri davomida jami 17 687 nafar aholini tibbiy ko‘rik va skrining tekshiruvlaridan o‘tkazish rejalashtirilgan. Hozirga qadar aniqlangan 4 849 nafar bemordan 182 nafari statsionar davolanishga, 4 667 nafari esa ambulator davolanishga olindi.
Mazkur tadbir Shofirkon tumanida aholi salomatligini mustahkamlash, kasalliklarni barvaqt aniqlash va sog‘lom turmush tarzini keng targ‘ib etishda muhim ahamiyat kasb etmoqda.
Viloyat hokimligi matbuot xizmati