Peshku: “Yangibozor”da Nasriddinovlar xonadonida nasldor quyon soni 200 boshga yetkazildi
2026-02-02 16:10:00 / Yangiliklar
Mehnatkash oila uchun quyonchilik ham istiqbolli tarmoq. Bu jonivor tez koʻpayishi, semirishi va foydaliligi bilan ajralib turadi. Viloyatimizda ommalashayotgan “pahlavon” va shu kabi boshqa naslli quyonlarni parvarishlashning zavqli tomonlari ham bor. Jumladan, bu turdagi quyon yarim yildan koʻproq muddatda yaxshi parvarishlansa, 6-7 kilogramm “tosh” bosadi. Bemalol 5 kilogramm atrofida parhezbop goʻsht qiladi. Demak, quyon goʻshti kilogramini oʻrtacha 50 ming soʻmdan hisoblaganda, har bir bosh yetilgan quyon kamida 300 ming soʻm atrofida daromad degani.
Yangibozor mahallasida istiqomat qiluvchi Dilshod Nasriddinov ham xonadonida nasldor quyonlardan boqishni yoʻlga qoʻyib, oilaviy tadbirkorlik faoliyatini yuritmoqda. Avvaliga 4-5 bosh quyon parvarishi bilan boshlangan tashabbus tufayli bugunga kelib xonadondagi quyon soni 200 boshdan oshirilgan.
Mazkur loyihaning umumiy qiymati 200 million soʻmni tashkil etib, faoliyat toʻliq tashabbuskor, yaʼni Dilshodning oʻz mablagʻi hisobidan amalga oshirilmoqda. Quyonchilik sohasi kam maydonda tashkil etilishi, yem-xashak xarajatlarining nisbatan pastligi, qisqa muddatda nasl berishi hamda mahsulotlarining tez realizatsiya qilinishi bilan yuqori iqtisodiy samaradorlikka ega.
Xonadon sohibining aytishicha, quyon parvarishidan yarim yilda oʻrtacha 35 million soʻm foyda qoʻlga kiritilmoqda. Darvoqe, quyon tez bolalaydi, tugʻilganidan uch oy oʻtib, koʻpayadi, har koʻpayganda, qirq kunda 10 tagacha bolalaydi. Har bir quyon bir kunda oʻrtacha 200-250 gram kombi-korm, yaʼni omuxta yemi bilan oziqlanadi. Semirib yetilguniga qadar esa umuman, 30 kilogram atrofida yem taqozo qilinadi. Muhimi, goʻshti halol va parhezbop. Mutaxassislar fikriga koʻra, quyonning nafaqat goʻshti va terisi, balki uning yogʻi ham ekologik toza mahsulot boʻlib, jahon kosmetologiyasida keng foydalaniladi. Ayniqsa, quyonning terisi va moʻynasini sanoat usulida qayta ishlab, eskport qilish tadbirkorlarga moʻmay daromad keltiradi.
Nasriddinovlar xonadonida parhezbop quyon goʻshti yetishtirish va ichki bozorga yetkazib berish, quyon terisidan mahsulotlar tayyorlash, zotli quyonlarni koʻpaytirish va sotuvga chiqarish ishlari jadal olib borilmoqda. Muhimi, bu faoliyat tufayli tashabbuskor yigit oʻzi va oila aʼzolarini doimiy ish bilan taʼminlab, barqaror daromad manbaini shakllantirgan.
Viloyat hokimligi matbuot xizmati