Buxoro viloyati hokimligi

Oilaviy hamjihatligi, umr yoʻldoshi Hayotjon Soliyev koʻmagida, qolaversa, voyaga yetkazayotgan 3 farzandi bilan birgalikda xonadon bekasining mavjud imkoniyatlardan unumli foydalanayotgani, oilaviy tadbirkorlikda erishayotgan yutuqlari, ish tajribasi bilan bugun mahalladoshlariga namuna boʻlib kelmoqda. 
 

Ayni kunda xonadon hovlisidagi ekin yeri 20 sotixni tashkil etib, har mavsumda undan samarali foydalanilmoqda. Jumladan, ayni paytda 1 sotixdan oshiq yerda sarimsoqpiyoz, ismaloq va koʻkatlar ekib yetishtirilgani oʻrtacha 2 million soʻm daromad olishga zamin yaratmoqda. 
 

Shuningdek, xoʻjalikda fevral oyi boshidan 14 sotix tomorqa yeri alohida tayyorlanib, kartoshka va boshqa oziq-ovqat mahsulotlarini ekish uchun tayyorlab qoʻyilgan. Oʻtgan yili bahor oylarida 200 kilogram urugʻlik kartoshka ekib, shundan 1,5 tonnadan orttirib sara hosil olishgan. Ikkinchi hosilga bulgʻor qalampiri, pomidor va bodring yetishtirilgan.  
 

Xonadon bekasi Jamila Rasulova oila aʼzolari, kelini Sharifa Nazarova hamda oʻgʻli Shamshod Nutfullayev bilan birgalikda oilaviy tadbirkorlikni rivojlantirishmoqda. Dehqonchilik barobarida 2024-yildan asalarichilik yoʻnalishida hokimning mahalladagi yordamchisi tavsiyanomasi asosida 33 million soʻm kredit mablagʻini olib, bundan 30 ta asalari oilasi xarid qilingan. Bugunga kelib bu asalari uyasi soni 60 taga yetkazilgan. Issiq mavsumda, bahor va kuzda  bu asalari uyalarini har biridan 10 kilogramdan oshirib bol olingan. Yakunlangan yilda bir oilaning asalarichilikdan erishgan umumiy daromadi 75 million soʻmdan kam emas. 
 

Erishilayotgan moddiy manfaatdorlik ortidan oila mehnatkashlari  imkoniyatlari, ishchi kuchlarini chamalab,  yanada kattaroq loyihaga qoʻl urishdi. Qishloq joyida qoramol boqqanning qut-barakasi bor. Roʻzgʻorda goʻsht, sut, qatiq, sariyogʻ kabi darmondoriga boy mahsulotlar serob boʻlishi, hatto ulardan mahalladoshlar dasturxoniga peshma-pesh yetkazib, moʻmay daromadga erishish mumkin. Shu oʻyda yakdil qarorga kelinib, tijorat bankidan 200 million soʻm imtiyozli kredit mablagʻi rasmiylashtirib olingani 25 bosh nasldor qoramol xaridi uchun  sarflandi. 
 

“Qizil choʻl” zotiga mansub qoramollar bilan birga “golshteyn”, “smental“ zotlariga doir nasldor chorva mollari ogʻilxonani toʻldirdi.

Jamila Rasulova hamda Hayotjon Soliyevlar xonadonida ikki-uch yil burun shu tartibda astoydil ishga kirishilgan boʻlsa, bugungsha kelib ogʻilxonasida parvarishlanayotgan chorva mollari soni 50 boshga yetkazilibdi. Koʻrinib turibdiki, qoramol parvarishidan durustgina moddiy manfaatdorlikka erishilmoqda. Sut, goʻsht mahsulotlari bilan birga qoramol parvarishiga qiziqqan mahalladoshlarga nasldor mollar buzogʻidan yetkazib berilayotgani ham yaxshigina daromad.