Olot: soyinqorovullik Bobonazar Qulliyev ham xonadoniga quyosh panellarini oʻrnatdi
2026-01-29 17:15:00 / Yangiliklar
Yurtimizda energiya tejovchi texnologiyalarni keng joriy etish, xususan, quyosh panellari, muqobil suv isitish qurilmalarini oʻrnatishni ragʻbatlantirish borasida muhim chora-tadbirlar amalga oshirilmoqda. Bu yoʻnalishda aholiga soliq imtiyozlari, bankning past foizli kreditlari va amaliy koʻmak taqdim etilayotgani eʼtiborga molikdir. Ayni kunda Olot tumanida ham bu imkoniyatlardan foydalanayotgan xonadonlar soni yil sayin ortib bormoqda.
Energiya resurslariga boʻlgan talabning yuqoriligi, qayta tiklanuvchi energiya texnologiyalarini joriy etish nafaqat iqtisodiy samaradorlikni oshiradi, balki ekologik barqarorlikni ham taʼminlaydi. Ayniqsa, “Yashil kredit” loyihasi doirasida xonadonlarga quyosh panellarining oʻrnatilayotgani bu saʼy-harakatning samaradorligini yanada oshirmoqda.
Jumladan, Olot tumanidagi “Soyinqorovul” mahalla fuqarolar yigʻinida yashovchi Bobonazar Qulliyev oʻz xonadoniga 50 kVt soat quvvatga ega quyosh panellarini oʻrnatib, mahalladoshlari uchun amaliy namuna koʻrsatmoqda.
— Muqobil energiya manbasi, quyosh paneli tufayli xonadonimizdagi elektr energiyasi taʼminoti bilan bogʻliq muammolar butunlay bartaraf etildi. Quvonarlisi, mahallamizda bu tizimga qiziqayotganlar, quyosh panellarini oʻrnatayotganlar safi kengaymoqda. Eng muhimi, uzluksiz elektr taʼminotiga ega boʻlish bilan birga, energiyani tejashga hissa qoʻshyapman. Bundan tashqari, yer-mulk soligʻi boʻyicha imtiyozlarga ega boʻlib, kuniga oʻrtacha 350–400 ming soʻm daromadga ega boʻlayotganimiz ham ayni muddao,— deydi xonadon egasi Bobonazar Qulliyev.
Mutaxassislar hisob-kitobiga koʻra, mazkur xonadon oʻz ehtiyojidan ortiq boʻlgan elektr tokidan oyiga qariyb 10 ming kilovatt-soat elektr energiyasini tarmoqqa sotmoqda. Bu esa oyiga 10 million soʻm atrofidagi qoʻshimcha daromad olish imkonini bermoqda. Aholi xonadonlari uchun quyosh panellarini oʻrnatish qulay, foydali va ekologik toza boʻlgani bois, bu texnologiyalar kelajakda energiya mustaqilligini taʼminlashda muhim omil boʻlib xizmat qiladi.
Viloyat hokimligi matbuot xizmati