Buxoro shahrida perinatal yoshdagi ayollar tibbiy koʻrikka jalb qilindi
2026-01-27 17:30:00 / Yangiliklar
Jumladan, Buxoro shahar tibbiyot birlashmasiga qarashli 10-sonli oilaviy poliklinika tomonidan Buxoro shahar tugʻruq kompleksi mutaxassislari bilan hamkorlikda tugʻish yoshidagi ayollar hamda homilador ayollar oʻrtasida tibbiy koʻrik oʻtkazildi.
Tibbiy koʻrik davomida ayollar orasida uchraydigan kasalliklarni erta aniqlash, zarur davo choralarini koʻrish, fertil yoshdagi ayollarning reproduktiv salomatligini tiklash, kontratsepsiya usullarini individual qoʻllash, shuningdek, bachadon boʻyni saratoni kabi kasalliklarni barvaqt aniqlashga qaratilgan zamonaviy tekshiruvlar—ultratovush tekshiruvi (UTT) va kolposkopik koʻriklar amalga oshirildi.
Tadbir davomida jami ellikdan oshiq ayol tibbiy koʻrikdan oʻtkazilgan boʻlsa, natijalarga koʻra 3 nafar ayolga ixtisoslashtirilgan jarrohlik koʻrigidan oʻtish uchun yoʻllanma berildi. Shuningdek, 2 nafar ayolga kolposkopik plastik amaliyot oʻtkazish tavsiya etilgani holda 6 nafar muammoli homilador ayolga statsionar davolashni davom ettirish uchun mutaxassislar tomonidan yoʻllanma berildi.
Taʼkidlash joizki, mazkur tibbiy tadbir ayollar salomatligini muhofaza qilish, ularga koʻrsatilayotgan tibbiy xizmat sifatini oshirish, shuningdek, soha mutaxassislari oʻrtasida bilim va amaliy koʻnikmalar almashinuvini mustahkamlashda muhim ahamiyatga ega.
Viloyat hokimligi matbuot xizmati