Kogon shahar: "Tashabbusli budjet" loyihasi tufayli “Zirabod”dagi maktab ham oʻz kutubxonasiga ega boʻladi
2026-01-24 15:55:00 / Yangiliklar
Kogon shahrining 10-sonli umumtaʼlim maktabi jamoasi ham 2025-yil ikkinchi mavsumi davridagi ovoz berish natijalariga koʻra gʻolib deb topilgan. Bu tashabbus va hamjihatlik tufayli umumiy qiymati 1 milliard soʻmga teng mablagʻ hisobidan taʼlim maskani uchun talab darajasidagi kutubxona qurish taklifi roʻyobga chiqadigan boʻldi.
Shundan soʻng viloyat hokimligi huzuridagi “Yagona buyurtmachi xizmati” injeniring kompaniyasi buyurtmasi asosida “Buxoro Nusrat servis” MCHJ tomonidan loyihalashtirilgan bino qurilishini mahalliy pudratchilardan Sh. Safarov boshchiligidagi "Muxammedov—Radjabov" MCHJ ishchi-mutaxassislari oʻz zimmalariga olishgan.
Ayni kunda bu manzilda qurilish va taʼmirlash ishlari mexanizatsiyalashgan quruvchilar jamoasi tomonidan olib borilmoqda. Ahamiyatli jihati, bu tashabbus tufayli umumtaʼlim maktabida tahsil olayotgan zirabodlik 1347 nafar oʻquvchi zarur badiiy kitoblar fondi, shuningdek, kerakli darsliklardan foydalanishlari uchun yanada qulay imkoniyatga ega boʻladi.
Maʼlumot uchun, mazkur taʼlim muassasasi binosi oʻtgan asr qirqinchi yillarida barpo qilingan boʻlib, hozirda taʼmirtalab holga kelgan. Yaqin yillarda taʼlim dargohi oʻquv binosini ham yangidan qurib bitkazib, barkamol avlodga qulay va shinam shart-sharoit yaratilsa, maqsadga muvofiqdir. Ayni kunda oʻzbek va rus tillarida saboq berilayotgan maktabda taʼlim-tarbiya ishlari ikki navbatda olib borilayotgan boʻlib, unda 92 nafar pedagog oʻqituvchi yoshlarga masʼul sifatida biriktirilgan.
Viloyat hokimligi matbuot xizmati