Buxoro viloyati hokimligi

Mazkur tadbir Oʻzbekiston Respublikasi Prezidentining 2026-yil 5-yanvardagi “Respublika mahallalarida xavfsiz muhitni yaratish yoʻnalishida yaxlit, manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida”gi PQ–1-son hamda “2026-yilda respublika mahallalarida jinoyatchilikning barvaqt profilaktikasi samaradorligini yanada oshirish boʻyicha tashkiliy chora-tadbirlar toʻgʻrisida”gi PQ–2-sonli qarorlarining mazmun-mohiyatini joylarda keng tushuntirishga qaratildi. Mazkur  qarorlar jinoyatchilikka qarshi kurashda tizimli, aniq va kompleks yondashuvni kuchaytirishga qaratilgani bilan ahamiyatlidir.

Seminarda ijtimoiy profilaktika samaradorligini oshirish va mahallalarda manzilli profilaktik chora-tadbirlar tizimini samarali joriy etish orqali jinoyatchilikni keskin kamaytirish, har bir mahallada kriminogen vaziyatga salbiy taʼsir etuvchi omillar bilan ishlashning mahallalar kesimida har choraklik manzilli chora-tadbirlarini belgilash hamda ularning mahalla-tuman-viloyat darajasida ijrosi uchun bevosita masʼul rahbarlarni biriktirish, amalga oshirilgan tadbirlar samaradorligi yuzasidan qatʼiy soʻrov tizimini yoʻlga qoʻyish boʻyicha  mutasaddilarga aniq vazifalar va koʻrsatmalar berildi.

Seminar mashgʻulotida Oʻzbekiston Respublikasi IIV akademiyasi masʼul xodimi Jasur Oʻroqov, viloyat hokimining oʻrinbosari Hafiza Artikova, viloyat prokurorining birinchi oʻrinbosari Aliakbar Poʻlatov, viloyat adliya boshqarmasi boshligʻining birinchi oʻrinbosari Qayum Xolov, viloyat sogʻliqni saqlash  boshqarmasi boshligʻi Elyor Oltiyev, tuman prokurori Anvar Esanov, tuman hokimi Hayot Davlatovlar har bir yoʻnalish boʻyicha batafsil tushuntirishlar berib, amaliy tavsiyalari bilan oʻrtoqlashdilar.

Masala dolzarbligi nuqtayi nazaridan, endilikda viloyat shahar va tumanlarida “Ijtimoiy profilaktika haftaligi”ni bir oyda bir marotaba oʻtkazib borish va ularda tegishli xizmatlar ishi samaradorligini baholash toʻgʻrisidagi takliflar shakllantirilmoqda. Bu takliflar bevosita kriminogen vaziyati ogʻir, uch va besh yildan buyon “qizil” toifada qolayotgan, ayollar jinoyatchiligi, spirtli ichimlik va giyohvandlikka ruju qoʻygan shaxslar jinoyatchiligi hamda sudda nizolashayotgan oilalar salmogʻi yuqori boʻlgan mahallalarni qamrab olishga qaratiladi. 

Haftalik “Obod va xavfsiz mahalla” tamoyili asosida mahallalarda ijtimoiy profilaktika tadbirlarini amalga oshirish tartibi toʻgʻrisidagi nizomga muvofiq oʻtkaziladi. “Ijtimoiy profilaktika haftaligi” yakunini sarhisob qilgan holda kelgusida ish samaradorligini oshirish maqsadida adliya, sud va boshqa huquqni muhofaza qiluvchi organlar tomonidan “mahalla yettiligi” uchun ijtimoiy profilaktika boʻyicha qisqa muddatli seminar-treninglar oʻtkazib boriladi. 

Qayd etilganidek, oʻtgan davr mobaynida mahallalarda jinoyatchilik  kamaytirilgani amalga oshirilgan islohotlarning hayotiy samarasini yaqqol namoyon etdi. Yangi qaror esa erishilgan ijobiy natijalarni mustahkamlash, tizimdagi mavjud kamchiliklarni bartaraf etish hamda barcha masʼul idoralar faoliyatini yaxlit, manzilli va shaxsiy javobgarlik asosida tashkil etishga qaratilgani bilan ahamiyatlidir. Bu tashabbus xavfsiz jamiyat barpo etish yoʻlidagi muhim qadam sifatida baholandi. 

Viloyat prokurorining birinchi oʻrinbosari A. Poʻlatov 2025-yilda tumanda  ayollar jinoyati oshgani, shuningdek, oila va nikoh munosabatlarida sodir etilgan qotillik, ogʻir tan jarohati yetkazish kabi jinoyatlar salmogʻi yuqori ekanini keskin tanqid qildi. Shu munosabat bilan masʼullar zimmasiga aniq, manzilli va qatʼiy vazifalar yuklandi. 

Seminarda tuman ichki ishlar boʻlimi rahbariyati, hududdagi 36 ta mahalla “yettiligi” masʼullari, hamkor tashkilotlar vakillariga qaror ijrosi ustidan qatʼiy nazorat tizimi joriy etilishi maʼlum qilindi. Jinoyatlarni hisobdan yashirish va soxta hisobotlar kiritish qatʼiyan taqiqlanishi, samarali ishlagan xodimlar esa ragʻbatlantirilishi, davlat mukofotlariga tavsiya etilishi,  jamoatchilik oldida eʼtirof etilishi taʼkidlandi. Bu esa mahallalarda haqiqiy xavfsiz muhit yaratish va fuqarolarning davlat organlariga boʻlgan ishonchini yanada oshirishga xizmat qiladi.

Viloyat hokimligi matbuot xizmati