Buxoro viloyati hokimligi

Global raqobat va Oʻzbekiston stendi “Texworld NYC” – bu shunchaki koʻrgazma emas, balki kelajak modasi va toʻqimachilik trendlari belgilanadigan maydondir. Unda jahonning yetakchi brendlari, eng yirik mato ishlab chiqaruvchilari, mashhur dizaynerlar va xalqaro ekspertlar ishtirok etmoqda. Quvonarlisi, koʻrgazmaning markaziy qismidan oʻrin olgan Oʻzbekiston milliy stendi, xususan, Buxoro viloyatining faxri boʻlgan “Amirtex” mahsulotlari xorijlik mutaxassislar va investorlarda katta qiziqish uygʻotmoqda.

Raqamlashtirish va 12 ta Xalqaro sertifikat. “Amirtex” mahsulotlariga boʻlgan yuqori talabning siri nimada? 

Mutaxassislar buni korxonaning innovatsion yondashuvi bilan izohlashmoqda. Fabrika respublikada yagona boʻlib, uning ish faoliyati toʻliq raqamlashtirilgan. Bu esa ishlab chiqarish jarayonining shaffofligi, tezkorligi va aniqligini taʼminlaydi. Chet ellik hamkorlar uchun bu ishonchlilikning asosiy belgisidir.

Korxona naqd 12 ta nufuzli xalqaro sertifikatga ega (GS1 Uzbekistan, ISO 9001, SEDEX, GOTS, OCS, RCS, GRS, OEKO tex, Better Work, ICS Environment va hokazo). Bu mahsulotning jahon standartlariga toʻliq javob berishini kafolatlaydi va Yevropa hamda Amerika bozorlariga toʻsiqsiz kirish imkonini beradi.

Bugungi kunda dunyo bozori "Fast Fashion"dan koʻra ekologik toza mahsulotlarni afzal koʻrmoqda. “Amirtex” brendi ostidagi tayyor kiyim-kechak mahsulotlari aynan tabiiy, ekologik toza xomashyodan tayyorlangani bilan AQSH bozorida ustunlikka erishmoqda. Bundan tashqari, mahsulotlar nafaqat sifati, balki zamonaviy dizayni, ranglar uygʻunligi va bichimi bilan ham koʻrgazma ishtirokchilarini lol qoldirdi. Bu oʻzbek toʻqimachilik sanoatining endilikda faqat xomashyo emas, balki yuqori qiymatli tayyor mahsulot eksport qila olish salohiyatini namoyon etdi.

14 million AQSH dollarlik shartnomalar 

Koʻrgazma doirasida “Buxoro Agroklaster” MCHJ vakillari faqat namoyish bilan cheklanib qolmay, balki AQSH va boshqa davlatlarning yirik kompaniyalari bilan B2B (biznesdan biznesga) formatida toʻgʻridan-toʻgʻri muzokaralar olib bordilar.
Ushbu kelishuvlar nafaqat korxona uchun, balki Oʻzbekiston iqtisodiyoti va eksport geografiyasini kengaytirish yoʻlidagi muhim qadam hisoblanadi. “Buxoro Agroklaster”ning Nyu-Yorkdagi zafari “Made in Uzbekistan” yorligʻi ostidagi mahsulotlarning jahon bozorida oʻz mustahkam oʻrniga ega ekanligini yana bir bor isbotladi.

Viloyat hokimligi matbuot xizmati