Kogon tumani: xitoylik mutaxassislar koʻmagida “AQUATON” yorligʻi ostida gidroizolyatsiya polietileni tayyorlanmoqda
2026-01-21 10:00:00 / Yangiliklar
Xususan, masʼuliyati cheklangan jamiyati shaklidagi “Silk road innovation group” xorijiy korxonasi tomonidan “AQUATON” brendi ostida innovatsion usulda gidroizolyatsiyalangan polietilen ashyo ishlab chiqarish yoʻlga qoʻyilgan. Mazkur loyiha xitoylik investor Yura Zang tomonidan amalga oshirilayotgan boʻlib, uning umumiy qiymati 2,4 million AQSH dollarini tashkil etadi.
Taʼkidlash joizki, ayni paytda korxonada yiliga 600 ming kvadrat metr hajmdagi tayyor mahsulot ishlab chiqarish quvvatiga erishilgan. Loyihaning dastlabki bosqichida 35 ta yangi ish oʻrni yaratish koʻzda tutilgan boʻlib, bu aholi bandligini taʼminlash va ijtimoiy-iqtisodiy barqarorlikni mustahkamlashga xizmat qiladi.
“AQUATON” gidroizolyatsiya polietileni zamonaviy texnologiyalar asosida ishlab chiqarilgan boʻlib, suvni ushlab turish va sizib chiqishining oldini olish uchun zarur boʻlgan yuqori zichlik va elastiklik xususiyatlariga ega. Ushbu innovatsion material tuproqli, baland va murakkab relʼyefga ega hududlarda suv chiqishini kamaytirishda yuqori samaradorlikka ega.
Dastlab neft va gaz sanoatida qoʻllanilgan “AQUATON” gidroizolyatsiya materiali bugunga kelib eng ogʻir iqlim sharoitlarida ham oʻzini oqlab, qishloq xoʻjaligi va qurilish sohalarida keng foydalanilmoqda. Jumladan, sugʻorish tizimlari, kanal va ariqchalarni izolyatsiya qilish, drenaj tarmoqlari, suv omborlari hamda boshqa gidrotexnik inshootlarni himoyalashda, shuningdek, zararli chiqindilarning yer qatlamiga singib ketishining oldini olishda samarali vosita sifatida qoʻllanilmoqda.
Mazkur gidroizolyatsiyalangan polietilen ashyosining muhim afzalliklaridan biri — oʻrnatish jarayoni soddaligi boʻlib, u murakkab va qimmat qurilish texnikalarini taqozo etmaydi. Shuningdek, ushbu material anʼanaviy beton va boshqa gidroizolyatsiya vositalariga nisbatan tejamkor, tez oʻrnatiladi, vaqt va mablagʻ sarfini sezilarli darajada kamaytiradi. Harorat va turli tabiiy sharoitlarga chidamli boʻlib, zarurat tugʻilganda, boshqa hududga koʻchirish imkoniyatiga ham ega. Bundan koʻrinadiki, mazkur mahsulotni qishloq xoʻjaligida, fermer va dehqon xoʻjaliklari mahsulot yetishtirishida keng qoʻllash mumkin.
Viloyat hokimligi matbuot xizmati