Buxoro shahri: “Foshun” mahallasidagi tikuv sexi bir necha ayol bandligini taʼminlanmoqda
2026-01-20 14:45:00 / Yangiliklar
Masalan, koʻrpa, koʻrpacha va yostiqlar, mato boʻlaklari—qirqimlari, quroqlardan turli yostiq va boshqa toʻshamalar tikib, qavash chevarlardan sabr, did va peshona terini taqozo etadigan, oson boʻlmagan hunarlardan biridir. Bejirim tushirilgan har bir chok, andoza ortida chevar ayollar mashaqqati va mehr-muhabbati mujassamdir.
Viloyat markazining “Foshun” mahalla fuqarolar yigʻinida yashovchi Nozigul Yarashova ham ana shunday mashaqqatli hunar orqali oʻz tadbirkorlik faoliyatini yoʻlga qoʻygan. Uning tashabbusi ayollar tikuvchilik ishini qoʻllab-quvvatlash, milliy hunarmandchilikni rivojlantirish, xotin-qizlar bandligini taʼminlash borasidagi amaliy namunalardan biri.
Nozigulga oʻtgan yili hokimning mahalladagi yordamchsi tavsiyanomasi, “Oilaviy tadbirkorlik dasturi” doirasida tikuvchilik va ishlab chiqarish yoʻnalishida 33 million soʻm bank imtiyozli kredit mablagʻi ajratilgani kichik korxona koʻrinishini olgan sexi ishini yoʻlga qoʻyishiga asos boʻldi.
Bu sex tufayli hozirda mahallada kasanachilik yoʻli tanlanib, uyda ishsiz oʻtirgan xotin-qizlar ish bilan taʼminlandi. Ayollar bajarilgan ish hajmiga qarab haq olib, oilasiga qoʻshimcha daromad kiritishmoqda. Muhimi, bunda tikilayotgan koʻrpa, koʻrpachalar, yostiq va boshqa mahsulotlar buyurtma asosida egalariga yetkazilmoqda. Asosiysi, toʻy, maʼraka va boshqa oilaviy marosimlar, jumladan, kelinlar sepi uchun mazkur mahsulotlarga buyurtmalar ham koʻpaymoqda.
Ayni kunda ham tikuvchi, ham tadbirkorga aylangan chevar Nozigul Yarashova faoliyatini ijaraga olingan boʻsh joyda tashkil etgan. Tikuvchilikdan olinayotgan daromad, bir oylik sof foyda esa oʻrtacha 6–7 million soʻmni tashkil etmoqda. Hozirda bir necha ayollar bandligi taʼminlanayotgan kichik korxonani yanada kengaytirish, mahsulot hajmi, moddiy manfaatdorlikni oshirish choralari izlanmoqda.
Viloyat hokimligi matbuot xizmati