Shofirkon: “Joʻshura” va boshqa mahallalarda elektr energiyasi tarmogʻi modernizatsiya qilinmoqda
2026-01-20 12:40:00 / Yangiliklar
Mazkur maqsadda hozirda tuman elektr taʼminoti korxonasi tasarrufida boʻlgan jami 680 dona transformator punkti hamda 0,4/10 kVt soat kuchlanishga ega, umumiy uzunligi 1 354 kilometr boʻlgan elektr uzatish tarmoqlari orqali bu ehtiyoj bartaraf etib kelinmoqda. Bu muhandislik kommunikatsiya tarmogʻi ortidan aholi va isteʼmolchilarga elektr energiyasini barqaror yetkazib berish choralari koʻrilmoqda.
Tarmoqda elektr energiyasi taʼminoti tizimini yanada yaxshilash, mavjud muammolarni bartaraf etish maqsadida joriy yil uchun aniq reja-dasturlar ishlab chiqilgan. Unga koʻra, hududdagi 223 dona transformator punkti hamda 398 kilometrdan iborat 0,4/10 kVt soat kuchlanishli elektr uzatish tarmoqlarida joriy taʼmirlash ishlari olib borilishi belgilangan. Shuningdek, 85 dona transformator punkti va 285 kilometr uzunlikdagi elektr uzatish tarmogʻida mavjud muammolarni bartaraf etish, mukammal taʼmirlash ishlari amalga oshirilishi koʻzda tutilgan.
Bundan tashqari, past kuchlanishli elektr uzatish tarmoqlari va transformator punktlarini yangi qurish hamda modernizatsiya qilish boʻyicha manzilli roʻyxat asosida 11 dona yangi transformator punkti, 34 kilometr masofada elektr uzatish tarmogʻi qurilishi hamda 526 dona yangi tayanch ustun oʻrnatilishi taqozo etilmoqda. Bu ishlar elektr tarmoqlarining mustahkamligini oshirib, uzilishlarning oldini olishga xizmat qiladi.
Bu borada boshlangan amaliy ishlar doirasida jumladan, “Joʻshura” mahalla fuqarolar yigʻinidagi Savrak qishlogʻida ham muhim chora-tadbir koʻrilmoqda. Xususan, aholini uzluksiz elektr energiyasi bilan taʼminlash maqsadida eskirgan simyogʻoch tayanchlar oʻrniga 14 dona zamonaviy temir-beton tayanch ustuni oʻrnatilgani mahalliy aholini mamnun qildi.
Umuman, chekka tumanda olib borilayotgan mazkur saʼy-harakat qishki mavsumda elektr energiyasi taʼminotida kuzatilayotgan uzilish va nuqsonlarni bartaraf etish, aholiga koʻrsatilayotgan xizmat sifatini yaxshilash, infratuzilmani modernizatsiya qilish, aholiga zarur shart-sharoitni yaratishga qaratilgani bilan ahamiyatli.
Viloyat hokimligi matbuot xizmati