Buxoro viloyati hokimligi

Xuddi shunday, 570 gektarda 4 ming tonnadan ortiq kartoshka, shuningdek, 502 gektarda 8 ming tonna atrofida pomidor, 171 gektarda 3 ming 158 tonna sabzi, 580 gektarda 11 ming tonna atrofida piyoz, qolaversa, 700 gektardan ortiq yerda 30 ming tonnaga yaqin qovun-tarvuz va oshqovoq yetishtirish harakati har yili dehqonchilik mavsumida jadal tus oladi. 

Qishda yer tayyorlab, erta bahor mavsumidan esa tumanda birgina dehqon xoʻjaliklarining 170  gektarida kartoshka, umumiy hisobda 833 gektar maydonda piyoz, bulgʻor qalampiri, pomidor, bodring, karam, baqlajon va boshqa sabzavot mahsulotlari ekib parvarishlash ishlari ham qizgʻin boshlanadi. Zero, tomorqa—bandlik, toʻkinlik va arzonchilikni taʼminlashning samarali yoʻli, dasturxon toʻkinligi manbai hamdir.

Issiqxonadan toʻrt fasl davomida yuqori daromad olishni maqsad qilgan, yerning qadriga yetib, halol mehnati bilan ham oʻz oilasiga, ham el-yurt dasturxoniga toʻkinlik olib kelayotgan mirishkorlar safi tumanda ham kengaymoqda. Birgina “Boʻribek Chandir” mahalla fuqarolar yigʻinida istiqomat qiluvchi namunali tomorqachilardan Durdimurod Sherov, Norqul Hamroyev, Xolmurod hamda Toshpoʻlat Alloqovlar xonadonlarida har mavsumda serhosil sabzavot-poliz mahsulotlari, shuningdek, limon, apelsin, mandarin kabi tropik sitrus mevalar yetishtirilayotganini koʻrish mumkin. Mahallada mehnatsevar tomorqa egalaridan yana biri Tursuntosh momo Ostonovadir.

Ayni paytda nafaqa gashtini surayotganiga qaramay, Tursuntosh momo farzandlari, nevaralari bilan birgalikda tomorqa yerini qarovsiz qoldirmay, unumli foydalanib kelmoqda. Yiliga ikki-uch marotaba hosil olishga erishib, avvalo, oʻz roʻzgʻorini but qilmoqda. 
2023-yilda “Osiyo taraqqiyot banki” loyihasi asosida amalga oshirilgan “Iqlim oʻzgarishlariga moslashish” dasturi doirasida hududdagi oʻttizdan ortiq xoʻjaliklar qatori Tursuntosh momo ham 1 sotixli ixcham issiqxonaga ega boʻldi. Bu imkoniyat uning mehnatini yanada samarali boʻlishida xizmat qilmoqda.

Aniqrogʻi, issiqxonada almashlab ekish usuli asosida bulgʻor qalampiri, pomidor va bodring yetishtirilmoqda. Ayni vaqtda 800 tup pomidor koʻchati hosil berish arafasida boʻlib, har bir tupdan oʻrtacha 5 kilogramgacha hosil olish koʻzlanmoqda. Bundan tashqari, issiqxonada limon ham parvarishlanib, undan barakali hosil yigʻib olinmoqda.

Mirishkor xonadon bekasi momo uchun ekin yeridan samarali foydalanish, avvalo roʻzgʻor kam-koʻstini qoplash har kunlik maqsad. Myehnatkash, tashabbuskor tomorqachilar tajribasi esa qishloqda turmush sifatini yaxshilash, aholi bandligini taʼminlash va dasturxon moʻl-koʻlligini taʼminlashda katta ahamiyatga ega, albatta. 

Viloyat hokimligi matbuot xizmati