Gʻijduvon: “Baraka” MFYda “Oltinsoy” ekoturizm maskani barpo qilindi
2026-01-15 22:35:00 / Yangiliklar
Gʻijduvon tumani markazidan 15 kilometr uzoqlikda, bir tomoni Qizilqum choʻliga tutash “Qutchi” massiviga qarashli “Baraka” mahalla fuqarolar yigʻini soʻnggi yillarda obod manzillardan biriga aylandi.
Jumladan, “Baraka” massivida barpo qilingan “Yangi Oʻzbekiston” aholi maskanida ayni kunda 468 ta xonadonga moʻljallangan jami 24 ta, har biri 5 qavatdan iborat zamonaviy turar joy inshootlari qad rostlagan. Bu turar joylarning har biri 20 ta yosh oilani oʻz bagʻriga olishi barobarida tabiiy gaz, toza ichimlik suvi, elektr energiyasi, oqava suv tarmogʻiga ulangan boʻlib, atrofi moʻjaz shaharchani eslatadigan obod manzilga aylantirilmoqda.
Hududda barkamol avlod taʼlim-tarbiyasi uchun 1 ming 56 oʻringa ega 53-sonli, uch qavatli umumtaʼlim maktabi, 360 oʻringa moʻljallangan 57-sonli, ikki qavatli shinam davlat maktabgacha taʼlim tashkiloti, uning yonidan tuman tibbiyot birlashmasiga qarashli ikki qavatli oilaviy poliklinika qurib foydalanishga topshirilgani koʻplarni mamnun qildi. Endilikda hududda oʻndan ortiq savdo va maishiy xizmat koʻrsatish shaxobchasi bilan birga istirohat bogʻi ham tashkil etilayotgani, turar joy inshootlari atrofi koʻkalamzorlashtirilayotgani ayni muddao.
Shu bilan birga, “Baraka” MFYda 29 gektar maydonda “Oltinsoy” ekoturizm maskani barpo etilayotgani sayyohlik tarmogʻini rivojlantirish, mahalliy iqtisodiyotga munosib ulush qoʻshish, qoʻshimcha ish oʻrinlari yaratishda katta ahamiyatga ega, albatta. Mazkur zamonaviy majmua aholi va mehmonlar uchun qulay sharoitlar yaratishga xizmat qilmoqda. Maskanda ot, tuya va velosipedda sayohat yoʻnalishlari, qum ustida sport oʻyinlari, milliy va zamonaviy restoranlar hamda mehmonxonalar, sunʼiy choʻmilish havzalari va plyajlar kabi koʻplab xizmatlar yoʻlga qoʻyilmoqda.
Loyiha doirasida hududni obodonlashtirish va ekologik muhitni yaxshilashga ham alohida eʼtibor qaratilmoqda. Jumladan, piyodalar yoʻlaklari barpo etildi, 20 ming tup manzarali daraxt nihollari oʻtqazilib, 20 gektar yerda “yashil hudud” va zamonaviy sugʻorish tizimi tashkil etilmoqda. Natijada “Oltinsoy” nafaqat dam olish, balki ekologik turizmning namunali maskaniga aylanadi.
Amalga oshirilgan ishlar natijasida hududning sayyohlik jozibadorligi sezilarli darajada oshmoqda. Mazkur majmua yiliga 15 ming nafargacha sayyohni qabul qilish, shuningdek 50 ta doimiy va 150 ta mavsumiy ish oʻrni yaratish imkoniyatiga ega.
Viloyat hokimligi matbuot xizmati