Buxoro viloyati hokimligi

Gap “Arashan” zotiga  mansub qoʻylar xususida bormoqda. Narx-navosiga qiziqqanlar uchun, vodiy viloyatlarida atigi toʻrt-besh oylik qoʻzichoqning narxi soʻmda emas, dollarda hisoblanadi. Mahalliy hisori ona qoʻydan oʻrtacha 5-7 kilogramga teng qoʻzi olinsa, “Arashan” zotdor qoʻyidan olinadigan qoʻzisi 8-10 kilogam va undan ogʻirroq “tosh bosadi”. Hatto, oʻrtacha nasldor qoʻchqor narxi hozirda 5-7 ming AQSH dollari va undan ortiqqa baholanayotgani ham bor gap. Allaqachon bu zotli qoʻylar bozorga chiqarilgan va mamlakatimizda, jumladan, Buxoroda ham “Arashan” qoʻyiga ega boʻlgan aholi xoʻjaliklari  safi kengaymoqda. Mamlakatimiz goʻsht sanoatining alohida “delikates”i, yaʼni peshqadam tarmogʻi aynan qoʻychilikdan. Bilamizki, qoʻy goʻshti taʼmi va oqsilga boyligi bilan ham ajralib turadi.

Peshku tumanida ham mayda shohli chorva tarmogʻida zotdor “Arashan” qoʻylarini boqib koʻpaytirishda ham katta tajriba toʻplanmoqda. Masalan, “Navbahor” mahalla fuqarolar yigʻinida yashovchi Zulfiddin Sharipov xuddi shu barakali faoliyatini yoʻlga qoʻyganiga koʻp boʻlmagan. Mazkur tashabbus tufayli  hozirda uning qoʻrasidagi zotdor qoʻy soni 100 boshga yetkazilibdi. 

Bundan tashqari, Sharipovlar xonadoni mehnatkashlari qoʻyxonani kengaytirib, hozirda 70 bosh “Hisori” va 80 bosh “Arabi” qoʻylarini boqib parvarishlamoqdalar. Ayniqsa, “Arashan” zotli qoʻylarning yuqori sifatli goʻshti, yuqori ozuqaviy va moddiy qiymati loyiha muvaffaqiyatining asosiy tarkibidir. Bu zotning goʻshti oqsil, vitamin va minerallarga boy boʻlib,  mahalliy bozorda raqobatbardosh mahsulot sifatida qadrlanadi.

Sharipovlar oilaviy qoʻychilik xoʻjaligi umumiy qiymati 2,5 milliard soʻmni tashkil etib, uni amalga oshirish natijasida 4 ta doimiy ish oʻrni yaratilgan. Mahallada bandlikni taʼminlash, oilaviy tadbirkorlikni rivojlantirish, odamlarga daromad manbaini yaratishda bu kabi shaxsiy tashabbus va istiqbolli loyihalarning oʻz oʻrni bor, albatta. 

Viloyat hokimligi matbuot xizmati