Buxoro viloyati hokimligi

“Agrodiler” — don va moyli ekinlarni yigʻim-terimdan keyin tayyorlash, saqlash va qayta ishlash sohasida zamonaviy texnologiyalarni joriy etuvchi ishonchli va tajribali kompaniyadir. 

Kompaniya qishloq xoʻjaligi hamda agrosanoat majmuasi uchun kompleks yechimlar taklif etishga ixtisoslashgan.
Asosiy ishlab chiqarish infratuzilmasi 4 ta elevator, 1 ta moy zavodi hamda zagotovkalar ishlab chiqarishga moʻljallangan metallurgiya zavodidan iborat. Metallurgiya zavodi hozirda qurilish bosqichida boʻlib, uni foydalanishga topshirish 2026-yilning birinchi yarmiga rejalashtirilgan. Kompaniyalar guruhida qariyb 150 nafar xodim faoliyat yuritadi.

Agrodiler don va moyli ekinlarni qayta ishlash uchun moʻljallangan uskunalarni yetkazib berish, loyihalash, oʻrnatish va ishga tushirish boʻyicha xizmatlar koʻrsatadi. Kompaniya tozalash, quritish, tashish va saqlash tizimlarini oʻz ichiga olgan kompleks texnologik yechimlarni taklif etadi.

Agrodiler dunyoning yetakchi xorijiy va mahalliy ishlab chiqaruvchilari bilan hamkorlik qiladi hamda ilgʻor texnologiyalarni amaliyotga joriy etadi.

Mazkur kompaniya “Buxoro sanoatni rivojlantirish kompleksi” maxsus sanoat parkida Rossiyada ishlab chiqarilayotgan yuqori sifatli temir mahsulotlarini qayta ishlash va ishlab chiqarishni mahalliylashtirish loyihasini amalga oshirishga kirishgan. Loyihaga koʻra, kompaniya  dastlabki bosqichda 50 million AQSH dollari miqdorida investitsiya jalb qilib, yiliga 40 ming tonna quyma temir va 15 ming tonna temir mahsulotlari ishlab chiqaradi, 100dan ortiq ish oʻrinlari yaratadi.

Uchrashuvda loyihani amalga oshirish mexanizmlari muhokama qilindi. Viloyat hokimi tomonidan mehmonlarning hamkorlik boʻyicha takliflari maʼqullanib, ularni qoʻllab-quvvatlashga tayyor ekanliklarini bildirgan holda ishlab chiqarish jarayonlarini tezroq amaliyotga tatbiq etish kerakligini taʼkidlab oʻtdi. Hamkorlik istiqbollari kelishib olindi.