Buxoro viloyati hokimligi

Bu borada zamonaviy axborot texnologiyalarini amaliyotga joriy etish, tibbiy xizmatlarning shaffofligi, tezkorligi va samaradorligini taʼminlashga alohida eʼtibor qaratilmoqda. Ana shunday yangilanishlar doirasida Gʻijduvon tuman tibbiyot birlashmasi tasarrufidagi muassasalarda faoliyat yuritayotgan patronaj hamshiralarga viloyat Sogʻliqni saqlash boshqarmasi tomonidan koʻp funksiyali planshetlar topshirildi. Bu tashabbus tuman miqyosida tibbiy xizmatlarni raqamlashtirish yoʻlidagi muhim va amaliy qadam hisoblanadi.

Mazkur planshetlar orqali har bir fuqaroning shaxsiy tibbiy kartasi elektron shaklda, onlayn tarzda yuritiladi, tibbiy maʼlumotlar bevosita patronaj hamshira tomonidan yagona axborot tizimiga kiritiladi. Bu esa aholi salomatligi boʻyicha maʼlumotlarni tezkor, aniq va ishonchli shakllantirish imkonini beradi.

Eng muhimi, bu yangilik viloyatda eng koʻp aholisiga ega tumanda aholi salomatligini muhofaza qilish, tibbiy xizmatlarning sifati va tezkorligini yanada oshirish, kasalliklarning barvaqt oldini olish, har bir xonadon salomatligini doimiy nazoratga olib borish imkoniyatlarini kengaytiradi.

Bir soʻz bilan aytganda, “raqamli tibbiyot” sari islohotlar bugun Gʻijduvon tumanida ham oʻz samaralari, amaliy natijalarini bera boshladi. Bu esa aholi salomatligini taʼminlash yoʻlidagi islohotlar izchil va qatʼiyat bilan davom etayotgani yaqqol dalilidir.

Viloyat hokimligi matbuot xizmati