Qorakoʻl: Umar Boltayev ham oʻz xonadoniga quyosh panellarini oʻrnatib, oilasining elektr energiyasiga boʻlgan ehtiyojini toʻliq qondirish barobarida, qoʻshimcha daromad manbaiga ham ega boʻlmoqda
2026-01-12 21:25:00 / Yangiliklar
Soʻnggi yillarda jumladan, viloyatimizda qayta tiklanuvchi energiya manbalarini joriy etish, energiya tejovchi texnologiyalarni keng tatbiq qilish borasida qator muhim qaror va dasturlar hayotga tatbiq etilmoqda. Bu yangilik va islohotlar natijasida ayni kunda aholi xonadonlarida quyosh panellarini oʻrnatish ommalashib, oddiy fuqarolar uchun ham qulay va manfaatli imkoniyat, imtiyozlar berilmoqda.
“Yangi turmush” mahalla fuqarolar yigʻinida yashovchi Umar Boltayev ham oʻz xonadoniga quyosh panellarini oʻrnatib, bir vaqtning oʻzida oilasining elektr energiyasiga boʻlgan ehtiyojini toʻliq qondirish barobarida, ortiqcha ishlab chiqarilayotgan elektr energiyasini har bir kilovatini davlat soliq inspeksiyasi orqali 1000 soʻmdan sotish orqali qoʻshimcha daromad manbaiga ham ega boʻlmoqda.
— Xonadonimizga 50 kVt soat quvvatga ega quyosh panellarini oʻrnatdik. Bu quvvat oilamiz uchun toʻliq yetarli boʻlish bilan birga, isteʼmolimizdan ortgan elektr energiyasini sotish imkonini bermoqda,—deydi Umar Boltayev.—Dastlab panellarni tijorat banki imtiyozli kredit mablagʻi asosida oʻrnatgan boʻlsakda, hozirda sotilayotgan elektr energiyasidan tushayotgan daromad kredit toʻlovlarini bemalol qoplamoqda. Shu bois, barchaga quyosh panellarini oʻrnatib, muqobil energiya manbaiga ega boʻlishni tavsiya qilaman.
Xonadon sohibi Umar aka uchun bu tashabbusni amalga oshirishdan koʻzlangan maqsad faqat daromad orttirish emas, balki davlatimiz rahbari tomonidan qabul qilingan “Qayta tiklanuvchi energiya manbalarini va energiya tejovchi texnologiyalarni joriy etishni jadallashtirish toʻgʻrisida”gi qaror muhim ragʻbat va eʼtibor boʻlgan.
Darhaqiqat, bunday loyihalar nafaqat aholi turmush darajasini yaxshilash, balki elektr tarmoqlariga tushayotgan yuklamani kamaytirish, atrof-muhitni muhofaza qilish hamda energiya mustaqilligini taʼminlashda ham muhim ahamiyat kasb etmoqda. Xulosa qilib aytganda, quyosh panellarini oʻrnatish bugun nafaqat kelajak uchun sarmoya, balki hozirning oʻzidayoq oʻz samarasini berayotgan, iqtisodiy va ekologik jihatdan foydali tashabbusdir.
Viloyat hokimligi matbuot xizmati