Buxoro viloyati hokimligi

Ikki oydirki, Buxoro tumanida ham zamonaviy andozadagi mudofaa ishlari boʻlimi binosini mukammal taʼmirlashga jiddiy eʼtibor qaratilmoqda.  Binoni zamon talablari asosida qurish, mukammal taʼmirlash va jihozlash ishlariga umumiy qiymati 2 milliard 300 million soʻmga yaqin mablagʻ ajratilgan. Viloyat hokimligi huzuridagi “Yagona buyurtmachi xizmati injeniring kompaniyasi” davlat unitar korxonasi buyurtmachiligidagi mazkur inshoot mukammal taʼmirlash ishlarini pudratchi “Sardor bunyodkor plyus” MCHJ binokorlari oʻz zimmalariga olishgan.  

Ayni kunda pudratchi jamoa ishchi-mutaxassislari tomonidan ikki qavatli mudofaa boʻlimi va uning chaqiruv punkti binolari eshik-derazalarini plastik romlarga almashtirish, poli va shiftini yangilash, fasad qismini pardozlash kabi ishlar bajarilmoqda. Taʼmirlash ishlari doirasida binoning ichki va tashqi qismi toʻliq yangilanmoqda. Xususan, muhandislik-kommunikatsiya tarmoqlari, elektr taʼminoti, isitish va sovitish tizimlari zamonaviy talablarga mos ravishda qayta koʻrib chiqilmoqda. Shuningdek, xonalar dizayni yangilanib, ish jarayoni samaradorligini oshiruvchi qulay ish sharoitlari yaratilmoqda.

Yangicha dizayn asosida mukammal taʼmirlanayotgan va aholiga xizmat koʻrsatish uchun barcha qulayliklarga ega binoda navbatchilikni oʻtash uchun xona, boshqaruv punkti, arxiv, jismoniy va yuridik shaxslarni qabul qilish uchun maxsus joy, chaqiriluvchilar va hisobda turuvchilar haqida elektron maʼlumotlar bazasini yuritish xonasi hamda xizmat xonalari mebel, qish-yoz tizimida ishlaydigan sovutish tizimlari, kompyuter jamlanmalari va boshqa zarur buyumlar bilan toʻliq jihozlanadi.

Mamlakatimiz milliy armiyasining jangovar qudrati, salohiyati, buyuk ajdodlarimizning jasoratidan soʻzlovchi koʻrgazmali vositalar bilan bezatiladigan binoning ichki devorlari bu yerga keladigan yoshlar Qurolli Kuchlarimiz haqida kengroq bilim va maʼlumotlarga ega boʻlishini taʼminlaydi.

Viloyat hokimligi matbuot xizmati