Buxoro viloyati hokimligi

Muloqotda Oʻzbekiston Respublikasi Prezidentining 2019-yil 27-iyundagi “Ommaviy axborot vositalari mustaqilligini taʼminlash hamda davlat organlari va tashkilotlari axborot xizmatlari faoliyatini rivojlantirish boʻyicha qoʻshimcha chora-tadbirlar toʻgʻrisida”gi qarorida belgilangan vazifalar ijrosi hamda axborot xizmatlari faoliyati, ularning jurnalist va blogerlar bilan hamkorligi darajasi atroflicha tahlil qilindi. Bu borada ayrim matbuot xizmatlari sust ishlayotgani koʻrsatib oʻtildi.

Tadbirda matbuot xizmatlari faoliyatini doimiy oʻrganib borish, mavjud kamchiliklarni aniqlash, davlat organlari tomonidan axborot makonidagi turli tahdidlarga oʻz vaqtida, malakali javob berish mexanizmini yoʻlga qoʻyish boʻyicha ayrim tahliliy maʼlumotlar taqdim etildi. Shundan kelib chiqib, matbuot xizmatlari ishini faollashtirish lozimligi aytib oʻtildi.

Shuningdek, davlat organlari va tashkilotlari, hokimliklarning viloyatimiz hayotida kechayotgan ijtimoiy-siyosiy jarayonlar, amalga oshirilayotgan islohotlar haqidagi materiallarni oʻz axborot kanallari, markaziy nashrlar va telekanallar orqali eng uzoq va chekka hududlargacha yetkazib berish imkoniyatlari tahlil qilindi. Endilikda ularning faoliyatini yanada takomillashtirish, oʻzlari ishlayotgan tashkilotning ochiqligini taʼminlash va islohotlar natijasini aholiga yetkazishdagi rolini kuchaytirish zarurligi taʼkidlandi.

Ijtimoiy tarmoqlar bilan tizimli ishlash, tashkilotning PR-strategiyasini ishlab chiqish va axborot makonida ijobiy imijni yaratish kabi yoʻnalishlarda maxsus oʻquv-kurslarini tashkil etishga kelishib olindi.

Ochiq muloqotda matbuot kotiblari oʻz fikr va mulohazalarini bildirdi. Olim Joʻrayev ularning savollariga javob berdi.

Viloyat hokimligi matbuot xizmati