Qorakoʻl: Sherali Rahmatov ham qishloqda penablok tayyorlash sexini yuritmoqda
2026-01-09 18:40:00 / Yangiliklar
Bugun yurtimizda kichik biznes va xususiy tadbirkorlikni rivojlantirishga qaratilayotgan eʼtibor samarasi tuman va mahallalar miqyosida yaqqol sezilmoqda. Qorakoʻl tumanida ham biznes tashabbuslari qoʻllab-quvvatlanayotgani tufayli hududda ishlab chiqarish korxonalari tashkil etilayotgani, ijtimoiy muhofazaga olingan xonadonlar, ishsizlar uchun ish oʻrni va daromad manbai yaratilayotgani oilalar turmush tarzi yaxshilanishida muhim oʻrin tutmoqda.
“Yangi turmush” mahalla fuqarolar yigʻinida istiqomat qiluvchi Sherali Rahmatov ham shunday tashabbuskor yoshlardan biri. Hokim yordamchisining tavsiyasi bilan u imtiyozli bank kreditini olib, qurilish materiallari ishlab chiqarishiga ixtisoslashgan kichik sex tashkil etganiga koʻp boʻlmadi.
Mazkur sexda bugunga kelib qurilishbop penablok mahsuloti ishlab chiqarilmoqda. Binokorlik sohasi rivojlanayotgan hozirgi sharoitda bu mahsulotlarga talab yuqori boʻlib, ichki bozor ehtiyojini qondirishda muhim ahamiyat kasb etmoqda. Hozirda kichik korxonada 3 nafar mahalliy yosh ish bilan taʼminlanib, oylik daromadiga ega boʻlmoqda. Sherali Rahmatovning aytishicha, yaqin oylarda ish hajmini kengaytirib, qoʻshimcha 4 ta ish oʻrni yaratish harakatiga kirishilgan. Negaki, penablokka talab, buyurtma soni koʻpaygan.
—Mahalladoshlarimizni ish bilan taʼminlash barobarida ular kuchi bilan biznes ishimizni rivojlantirayapmiz. Hademay, yangi uskunalar olib kelishni, seximiz faoliyatini yanada samarali yoʻlga qoʻyishni koʻzlayapmiz. Yaratilgan imkoniyat va berilayotgan imtiyozlar biz yosh tadbirkorlar uchun katta madad va dalda boʻlayapti,— deydi Sherali Rahmatov.
Darhaqiqat, bunday tashabbuslar nafaqat bir oilaning turmush darajasini yaxshilash, balki yaxlit mahallaning iqtisodiy va ijtimoiy taraqqiyotiga hissa qoʻshmoqda. Yangi turmushliklar orasida avtomashinalarga texnik xizmat koʻrsatish, tikuvchilik, sartaroshlik, payvandlovchilik, novvoylik, usta duradgorlik va boshqa tarmoqlarda oʻz faoliyatini yoʻlga qoʻyib, hayotda mustahkam oʻrnini topayotgan yosh tashabbuskorlar safi kengaymoqda.
Viloyat hokimligi matbuot xizmati