Buxoro viloyati hokimligi

Tuman markazidan 15 kilometr uzoqlikdagi “Qumrabot” MFYda "Romstar" qoʻshma korxonasining dual taʼlim tarmogʻi va urugʻ tayyorlash biologik laboratoriyasi loyihasi masʼul ishchi guruhida katta qiziqish uygʻotdi. Pillachilikka ixtisoslashgan “Romstar” Oʻzbekiston–Rossiya–AQSH qoʻshma korxonasi nafaqat ipak ishlab chiqaruvchi korxona, balki zamonaviy texnologiyalar, ilm-fan va mehnatkashlik uygʻunlashgan innovatsion markaz sifatida shakllanmoqda.  

“Mugʻoncha” MFY Alamdor qishlogʻida faoliyat yuritayotgan korxona ishlab chiqarish quvvatlariga toʻxtalsak, Xitoy texnologiyasi asosida yil boʻyi 150 tonna xom ipak tola ishlab chiqarish imkoniyatiga ega. Tahlillarga nazar solsak, korxonada 2020-yilda 64 tonna ipak tola ishlab chiqarilib, mahsulot eksporti natijasida 2 milliard 358 million soʻm sof foydaga erishilgan boʻlsa, 2021-yilda bu miqdor ikki baravarga oshirilib, 100 tonnadan orttirilgan, 2022-yilda 120 tonnani, 2023-yilda 130,4 tonnani,  2024-yilda 135 tonnani va 2025-yilda 140 tonna “kumush tola” qayta ishlashga yoʻnaltirilgan. Xuddi shunday, buyurtmachilarga yetkazilgan ipak tola evaziga oʻtgan yilda qariyb 4,3 milliard soʻm sof foyda qoʻlga kiritilgan.

“Romstar”  korxonasida mavsum davomida 500 nafar ishchi doimiy ish bilan taʼminlansa, qurt boquvchilar bilan birgalikda bu koʻrsatkich 800 nafargacha yetadi.  Ishlab chiqarish jarayoniga jalb etilgan zamonaviy uskunalar inson mehnatiga nisbatan 7–10 barobar samaraliroq ishlaydi. Korxonaning Qumrabot mahallasidagi urugʻ ishlab chiqarish biolaboratoriyasiga kelsak, sex yangi texnologik liniyada 150 nafargacha ishchi-mutaxassisga ega boʻladi.  

Moliya-iqtisodiyot majmuasi tarkibiga kiruvchi tashkilot va idoralar, shahar va tumanlar hokimlari masʼullaridan iborat ishchi guruhi “Qahramon“ MFY da issiqxona xoʻjaliklari faoliyati bilan tanishdi. Mahallada ehtiyojmand oilalar aʼzolariga tomorqa sifatida ajratib berilgan 10 gektarli ekin yerida issiqxona barpo etilib, hosil yetishtirish ishlari jadal bormoqda.  

Qayd etish lozimki, ayni kunda 733 ta xonadon va deyarli 4 ming nafarga yetgan mazkur mahallada issiqxona yoʻnalishida band xonadon soni 608 tani, yaʼni 83 foizni tashkil etib, shundan 152 gektar issiqxona yerida dehqonchilik qilinmoqda. Shundan hududda aholi xonadonlarida 77 gektarda, daladagi 75 gektar yerda tashkil qilingan dehqon xoʻjaliklarida peshma-pesh hosil yetishtirish tajribasi shakllangan. 

“Bir mahalla — bir mahsulot” tamoyili asosida mahallada shakllangan tajriba asosida nihoyalangan yilda yana 10 gshektar yer maydoni ehtiyojmand oilalarga taqsimlab berilgan. Bu xoʻjaliklarni aniq bir ekin turiga ixtisoslashtirish, bunda tajribali fermer, dehqon va tadbirkor ayollar ish uslubini ommalashtirish muhim ahamiyat kasb etmoqda. Issiqxonalar yetti yil muddatga imtiyozli kredit mablagʻlari asosida rasmiylashtirilib berilgani ham aholiga qulaylikdir.

Aynan “Qahramon” mahallasidagi “Muhammadzohid Azim Buxoro” MCHJ tomonidan keyingi yillarda 1,2 gektar yer maydonida koʻchatchilikni rivojlantirishga oʻtilgan. Bu tarmoqda 20 nafar doimiy ishchi band boʻlib, asosan qishki mavsumda, erta bahor mavsumi uchun aholi tomorqalari, dehqon xoʻjaliklariga pomidor, bulgʻor qalampiri, baqlajon, sabzavot mahsulotlari koʻchatlarini sara urugʻidan ekib undirib yetkazib berishga ixtisoslashgan. 

MCHJning umumiy yer maydoni 2 gektar boʻlib, shundan 1,2 gektarida koʻchat yetishtirishga ixtisoslashgan issiqxonada shu kunlarda ish qizgʻin. Bu yerda xalqimiz sevib isteʼmol qiladigan pomidor, bodring va shirin qalampirning  serhosil navlari urugʻlari aynan Turkiya, Gollandiya va Isroildan keltirilib ekiladi. Unib chiqqan nihollar turli kasallik va zararkunandalarga qarshi emlangandan soʻnggina fermer va dehqonlarga yetkazilmoqda.

Shu kuni ishchi guruhi aʼzolari Qalaychorbogʻ mahallasida yashovchi Asalxon Qoʻziyeva nomiga berilgan 15 sotixdan iborat yer maydonida barpo qilingan issiqxonasida ham boʻldilar. Hozirda bu tomorqa yerida Qoʻziyevlar oila aʼzolari hamjihatlikda mehnat qilib, issiqxonada gidroponika usulida qulupnay ekib yetishtirmoqdalar. Bir necha oylik peshona teri evaziga mirishkorlar aholi dasturxoniga 4 tonnadan oshirib sarxil qulupnay yetkazib berish harakatidalar.  

Hududdagi tanishuv va oʻrganishlar yakunida masʼullar tomonidan tadbirkorlar va ular korxonalari faoliyatini yanada qoʻllab-quvvatlash, ishlab chiqarish hajmlarini kengaytirish, moliyalashtirish va infratuzilmani takomillashtirish bilan bogʻliq jihatlarga alohida eʼtibor qaratilib, taklif va tavsiyalar bildirildi. Muloqotda istiqbolli loyihalarni amalga oshirish bilan bogʻliq istiqboldagi rejalar yuzasidan ham fikr almashildi.

Viloyat hokimligi matbuot xizmati