Buxoro viloyati hokimligi

Kuni kecha viloyat hokimligi moliya-iqtisodiyot majmuasi tarkibiga kiruvchi tashkilot va idoralar, shahar va tumanlar hokimlarining birinchi oʻrinbosarlari, shuningdek, tijorat banklari masʼullari tumanda faoliyat olib borayotgan korxonalar faoliyati bilan yaqindan tanishdilar.

Dastlba hududdagi “Bukhara Best Builder” MCHJda tashkil qilingan qurilish materiallari va gigiyenik vositalar ishlab chiqarish loyihasiga  eʼtibor qaratildi. Xususiy tadbirkorga ajratilgan 3 gektar yer maydonida qurilish-jihozlash ishlari boshlanganiga 3 yildan oshgan. Mazkur loyiha investitsiya qiymati 5 milliard soʻmga teng boʻlib, shundan 1 milliard soʻm kredit sarmoyasi “Xalq banki” tuman filiali, qolgani esa tadbirkor oilaviy jamgʻarmasidan sarflanmoqda.  

Korxona toʻliq ishga tushgach, yiliga 5 ming tonna qurilish materiallari, quruq aralashmalar, lak-boʻyoq mahsulotlari, dekorativ vosita va toʻshamalar, shuningdek, 40 tonna gigiyenik vositalar ishlab chiqarib, xaridorlarga yetkazadi. Mahsulot ishlab chiqarish va sotishdan mahalliy byudjetga bir yilda 21 milliard soʻm mablagʻ miqdorida ulush qoʻshish imkoniyati yaratilmoqda. Hozirda “Bukhara Best Builder” MCHJga zarur texnologik liniya Xitoy davlatidan keltirib oʻrnatilgan boʻlib, korxonada 12 ta ish oʻrni yaratilgan va oʻndan ortiq oila moddiy manfaatdorligi taʼminlanmoqda.     

Ayni kunda 1007 ta xonadon, 1286 ta oila va ularda jami 5 mingdan ortiq  aholi vakili istiqomat qilayotgan “Oʻgʻlon” mahalla fuqarolar yigʻinida asosiy tirikchilik manbai dala-dehqonchilik ishlari, qishloq xoʻjaligi mahsulotlari yetishtirish, chorvachilik va maishiy xizmat koʻrsatish tarmoqlari hisoblanadi. Hududda mahalla nomi bilan ataladigan fermer xoʻjaligi asosan paxta va gʻalla yetishtirishda katta tajribaga ega boʻlib, qoʻshimcha tarmoqlarni oʻz imkoniyatini sinovdan oʻtkazmoqda. 

Jumladan, xoʻjalikda oʻtgan yildan boshlab chorvachilik tarmogʻini rivojlantirish, xususan, yilqichilikka eʼtibor qaratib, “Qorabayir” ot zotlarini parvarishlashga kirishilgan. Mazkur loyiha qiymati 2,5 milliard soʻmga teng boʻlib, bugunga kelib xoʻjalikda boqilayotgan zotdor ot soni 100 boshga yetkazilgan. Shundan 30 bosh “Qorabayir” zotiga mansub toy olingan. 

Muhimi, “Oʻgʻlon” fermer xoʻjaligida tashkil qilingan yangi yilqichilik tarmogʻi tufayli bugunga kelib 30 taga yaqin oilaning ish bilan bandligi, daromad manbai taʼminlanmoqda. Endilikda bu sektorni yanada rivojlantirib, tuyoq sonini koʻpaytirish, mahsuldorlik bilan birga oʻgʻlonliklar moddiy manfaatdorligini oshirish choralari koʻrilmoqda.       
  
Hududdagi tanishuv va oʻrganishlar yakunida masʼullar tomonidan tadbirkorlar va ular korxonalari faoliyatini yanada qoʻllab-quvvatlash, ishlab chiqarish hajmlarini kengaytirish, moliyalashtirish va infratuzilmani takomillashtirish bilan bogʻliq jihatlarga alohida eʼtibor qaratilib, taklif va tavsiyalar bildirildi. Muloqotda istiqbolli loyihalarni amalga oshirish bilan bogʻliq istiqboldagi rejalar yuzasidan fikr almashildi.

Viloyat hokimligi matbuot xizmati