Buxoro viloyati hokimligi

Yil sarhisobiga nazar tashlaydigan boʻlsak, oʻtayotgan yil mamlakatimiz, shu jumladan, Buxoro va buxoroliklar uchun taraqqiyot, yutuqlar, orzu-umidlarga boy, barakali yil boʻldi. 

Zamonaviy sanoat korxonalari ishga tushdi, infratuzilma va logistika tarmoqlari yangilandi, avtomobil va temir yoʻllar barpo etildi.
2025-yil dasturlari doirasida jami 477 ta obyekt qurildi, 156 ta ijtimoiy soha obyektlari, jumladan, 96 ta maktab, 21 ta maktabgacha taʼlim, 22 ta tibbiyot, 12 ta sport va boshqa obyektlarda qurilish-taʼmirlash ishlari amalga oshirildi. Buxoro shahri “Gulchorbogʻ” mahallasi hududida Yangi maʼmuriy markaz, “Shayxon” mahallasi hududida Buxoro davlat universitetining yangi kampusini barpo etish ishlari jadal surʼatlarda davom etmoqda. Qorakoʻl tumanida “Acharya” universitetining birinchi bosqich qurilish ishlari yakuniga yetkazilmoqda. “Qorakoʻl” erkin iqtisodiy zonasida sanoat ipotekasi asosida texnopark tashkil etilmoqda.

Buxoro tumanida “Yangi Oʻzbekiston bogʻi” barpo etilib, Buxoro shahri va Buxoro tumani aholisi uchun dam olish maskanlari yaratilmoqda.

Aholini barqaror daromad manbaiga ega qilish borasidagi ishlarimiz natijasida 269 ming  nafar fuqarolarning bandligi taʼminlandi. Kambagʻallik darajasi 8,7 foizdan 3,7 foizga tushirildi.

Albatta, har bir bayram, tantana arafasida sohadagi ilgʻor va faollarni taqdirlash anʼanaga aylangan. Shunga koʻra viloyatni ijtimoiy-iqtisodiy rivojlantirish, davlat dasturlari ijrosini taʼminlash borasidagi samarali faoliyati, yurtimizda amalga oshirilayotgan islohotlar ijrosini taʼminlashga qoʻshayotgan munosib hissasi uchun bir guruh rahbar va xodimlarni taqdirlashga bagʻishlangan tadbir boʻlib oʻtdi. 

Unda viloyat hokimi Botir Zaripov soʻzga chiqib, barchani Yangir yil bayrami bilan muborakbod etdi. 

— Yangi 2026-yilda ham viloyatimiz aholisiga munosib turmush sharoitini yaratish, iqtisodiyotimizda yangi marralarni zabt etish uchun ulkan dastur va rejalarni tuzmoqdamiz. Hech shubhasiz, bularning barchasi diyorimizda hurmatli Prezidentimizning bevosita rahnamoliklarida qaror topgan barqarorlik, doʻstlik va hamjihatlik natijasidir,-dedi viloyat rahbari. 

Taʼkidlanganidek, davlatimiz rahbarining 2025-yil 26-dekabrda Oliy Majlis va Oʻzbekiston xalqiga Murojaatnomasida 2026-yil – “Mahallani rivojlantirish va jamiyatni yuksaltirish yili” deb eʼlon qilindi.

Bu esa Mahalla infratuzilmasini tubdan yaxshilash orqali mamlakatimizni har tomonlama rivojlantirish, uning qiyofasini yanada goʻzal va obod qilish ishlari davom ettiriladi, deganidir.

Zero, Yurtboshimiz taʼkidlaganidek, “Yurt obodligi, avvalo, mahalladan boshlanadi.  Aynan mahalladagi yoʻl, suv, elektr va transport taʼminoti, bogʻcha, maktab va oilaviy poliklinikadagi shart-sharoitlarga qarab, odamlar islohotlarimizga baho beradi”. 

— Shu bilan birga mamlakatimiz rahbari oʻz Murojaatnomalarida Buxoro viloyatida Axborot texnologiyalari sohasida “Data markaz”, super-kompyuter va sunʼiy intellekt laboratoriyasi faoliyati yoʻlga qoʻyilishi, Buxoro temir yoʻl vokzali modernizatsiya qilinishi, umumiy foydalanishdagi avtomobil yoʻllarida rekonstruksiya ishlari yakunlanishi, botanika va dendrologiya bogʻlari tashkil etilishi kabi yirik loyihalarni qayd etib oʻtdilar. Shuningdek, yangi yilda biznesni rivojlantirish, ijtimoiy himoyaga muhtoj qatlamni qoʻllab quvvatlash, farzandlarimizning zamonaviy bilim va kasb-hunar egalari, barkamol boʻlib tarbiya topishlari uchun bor kuch va imkoniyatlarimizni safarbar etamiz. Muxtasar aytganda, Prezidentimiz tomonlaridan ilgari surilgan “Inson qadri uchun, inson baxti uchun!” degan olijanob maqsadni barchamiz birgalikda amalga oshiramiz,-dedi Botir Zaripov tabrigida.

Tadbirda hokimlik boshqaruvi apparati xodimlari, huquqni muhofaza qilish organlari, iqtisodiyot majmui, ijtimoiy, turizm, kapital qurilish, kommunikatsiyalar, kommunal xoʻjalik va obodonlashtirish masalalari majmui, jamoat tashkilotlari va siyosiy partiyalar rahbarlari viloyat hokimligining tashakkurnomasi bilan taqdirlandilar.

Taqdirlanganlar orasidan soʻz olganlar oʻzlariga bildirilgan ishonch uchun minnatdorlik bildirib, viloyatni ijtimoiy-iqtisodiy rivojlantirish borasida yanada jonbozlik bilan faoliyatlarini davom ettirishlarini aytib oʻtishdi. 

Viloyat hokimligi matbuot xizmati