Kogon tumani: “Farzona” toʻyxonasida 10 nafar bolajonning sunnat toʻyi nishonlandi
2025-12-29 22:00:00 / Yangiliklar
Kogon tumanida ham yangi 2026-yil kirib kelishi munosabati bilan qator xayrli tadbirlar tashkil etilmoqda. Ana shunday ezgu tashabbuslardan biri sifatida hududda umrguzaronlik qilayotgan ehtiyojmand, ijtimoiy muhofazaga olingan oilalar farzandlaridan 10 nafarining sunnat toʻyi marosimi tashkil qilindi.
“Farzona” toʻyxonasida boʻlib oʻtgan bu xayrli tadbirda turli mahallalardan saralangan, oilalari moddiy jihatdan qiyin ahvolda boʻlgan 10 nafar bolajonning sunnat toʻyi boʻlib oʻtdi. Tuman hokimligi, Oʻzbekiston Mahallalari uyushmasi tuman boʻlimi, “Inson” ijtimoiy xizmatlar markazi va saxovatpesha homiy tadbirkorlar tomonidan tashkillashtirilgan toʻy marosimida bolalar uchun milliy liboslar, esdalik sovgʻalari tayyorlanib, ular sharafiga bayram dasturxoni yozildi.
Sunnat toʻyi munosabati bilan soʻzga chiqqan tuman hokimligi, nuroniylar, jamoatchilik vakillari yurt ozodligi, istiqlol tufayli yurtimizda tinchlik, barqarorlik va xalq manfaatini koʻzlagan ezgu saʼy-harakat izchil davom ettirilayotganini eʼtirof etdilar. Koʻpni koʻrgan otaxonu onaxonlar bolajonlarga oʻzlarining ezgu tilaklarini izhor qilishib, duoga qoʻl ochdilar.
Milliy urf-odat va anʼanalarimizga muvofiq tashkil etilgan sunnat toʻyida bolajonlarga sarupolar, shuningdek, velosiped va yangi yil sovgʻalari topshirildi. Albatta, bu kabi insonparvarlik tashabbusi xalqimiz oʻrtasida oʻzaro mehr-oqibat va hamjihatlikni mustahkamlash, farzandlarimizni Vatanga muhabbat va insonparvarlik ruhida tarbiyalashga xizmat qiladi.
Toʻy tadbirida xushovoz xonandalar chiqishlari, bolalar uchun oʻyin-kulgi, shoʻx tomoshalar, konsert dasturi tashkillashtirilgani barchaga bayramona kayfiyat, davraga fayz ulashdi.
Viloyat hokimligi matbuot xizmati