Buxoro viloyati hokimligi

Qayd etish lozimki, viloyat prokuraturasi tomonidan amalga oshirilgan xayrli tashabbus uchun mahalliy byudjet hisobidan 7,2 mlrd soʻm hamda tadbirkor va tashabbuskor homiylar hisobidan 8,7 mlrd soʻm sarflandi. Loyiha doirasida ushbu koʻchada 90 ga yaqin tadbirkorlik subyektlari faoliyati kengaytirilgani nafaqat mahalla, balki shaharning iqtisodiy imkoniyatlarini rivojlantirishga turtki boʻldi. Tadbirkorlik binolarining birinchi qavatida turli xil kafelar, restoranlar va strit-fud (koʻcha taomlari) shaxobchalari faoliyati yoʻlga qoʻyildi. 

Mazkur tashabbus nafaqat iqtisodiy faollikni oshirish, balki Buxoroning boy madaniy va gastronomik merosini yanada keng targʻib etishga xizmat qiladi. Yangi gastronomik koʻcha bugungi kunda shahar aholisi va mehmonlar uchun quvnoq dam olish, oilaviy hordiq chiqarish uchun sevimli maskaniga aylanmoqda.

Shuningdek, hududdagi, 1,6 km yoʻlaklar bordyurlashtirildi, 1,6 km kabellashtirish ishlari bajarildi, shuningdek, koʻcha chiroqlari oʻrnatildi, ichimlik va issiqlik suvi quvurlari yangilandi, piyodalar yoʻlagi betonlashtirildi, hududda manzalari daraxt va gul koʻchatlari ekildi. 

Mazkur koʻchaning ramziy ochilishi munosabati bilan tashkil etilgan tadbirda viloyat hokimi Botir Zaripov soʻzga chiqib, shahar aholisi va mehmonlarini Yangi yil bayrami va unga hamohang ish boshlayotgan gastronomik koʻcha ochilishi bilan qutladi. 

Viloyat rahbari oʻz nutqida bevosita davlatimiz rahbari tomonidan mahallalar infratuzilmasini yaxshilash, odamlarning hayot farovonligini oshirishga alohida eʼtibor qaratilayotganini mamnuniyat bilan taʼkidladi.
 
Prezidentimizning Oliy Majlis va Oʻzbekiston xalqiga yoʻllagan navbatdagi Murojaatnomasi bu borada ertangi marralarni aniq belgilab beradigan tarixiy-siyosiy hujjat boʻlganligini eʼtirof etdi. 

2026-yilni yurtimizda “Mahallani rivojlantirish va jamiyatni yuksaltirish yili” deb eʼlon qilinishi — bu jamiyatni quyi boʻgʻindan boshlab mustahkamlashga qaratilgan uzoqni koʻzlagan strategik qarordir. Zero, mahalla shunchaki jamiyat boshqaruvining quyi tizimi boʻlibgina qolmay, asrlar osha milliy urf-odat va anʼanalarimizni bezavol saqlab kelayotgan xalqimiz uchun ezgulik va tarbiya beshigi, yaxshi qoʻshnichilik va hamjihatlik maskani hamdir.

Shu nuqtayi nazardan, yangi yil dasturida yurtimizdagi mahallalarni, avvalo, mehr-oqibat, hamjihatlik, adolat va tarbiya maskaniga aylantirish kabi dolzarb masalalar oʻz ifodasini topishi urgʻulandi. Kelgusi yildan esa mahallani rivojlantirish boʻyicha kompleks yondashuv joriy etiladi.

Botir Zaripov 24/7 ish rejimida faoliyat koʻrsatayotgan gastronomik koʻchalar shaharning sayyohlik jozibadorligini oshirish, aholi bandligini taʼminlash va xizmat koʻrsatish sohasini rivojlantirishda muhim ahamiyat kasb etishini taʼkidlab oʻtdi. 

Shu munosabat bilan har bir shahar va tuman markazlarida shunday namunaviy koʻchalarni tashkil etish, mahalliy hunarmandchilik, milliy taomlar hamda zamonaviy servis xizmatlarini birlashtirgan loyihalarni amalga oshirish boʻyicha ishlar boshlanishi aytib oʻtildi. 

Shundan soʻng koʻchada yaratilgan shart-sharoitlar, tadbirkorlar uchun berilgan imkoniyatlar va infratuzilma bilan yana bir bor tanishildi.

Tadbirda bayramona konsert dasturi namoyish etildi. 

Viloyat hokimligi matbuot xizmati