Buxoro viloyati hokimligi

Yurtimizda olib borilayotgan islohotlarni mazkur manzillarda istiqomat qilayotgan qardoshlarimiz qay darajada his qilishmoqda? Har yilgi anʼanaga muvofiq, ayni yangi yil bayrami arafasida viloyat hokimi Botir Zaripov boshchiligidagi mutasaddilar choʻl bagʻrida umrguzaronlik qilayotgan yurtdoshlarimizni yoʻqlab borishib, ular holidan xabar oldilar.  

Dastlabki manzil “Qizilravot” mahalla fuqarolar yigʻini hududidagi 38-umumtaʼlim maktabi boʻldi.  100 oʻrinli mazkur muassasa 1984-yilda qurilgan boʻlib, hozirda 54 nafar oʻquvchi taʼlim-tarbiya oladi. Taʼlim qozoq tilida olib boriladigan muassasada bugungi kunda 20 nafar pedagog faoliyat koʻrsatmoqda. Shuningdek, bu yerda 10 oʻringa ega bolalar bogʻchasi ham faoliyat koʻrsatmoqda. 

Viloyat rahbari maktab rahbariyati va tizim masʼullari bilan suhbatlashib, mavjud muammolar bilan qiziqdi. Ularni hal qilish boʻyicha vazfalar belgilandi. 

Ayni kunda Qizilqum va Gugurtli aholi massivlari bilan qoʻshib hisoblaganda, “Qizilravot”da bugun 135 ta xonadonda aksari qozoq millatiga mansub 800 ga yaqin aholi istiqomat qilmoqda. 

Uzoqqa bormaylik, bugungi “Qizilravot” oʻn yil burungisidan keskin farq qiladi. 

Buni ovul aholisi turmush tarzida yaqqol koʻrish mumkin. Masalan, “Obod qishloq” davlat dasturi doirasida mahalla aholisini toza ichimlik suvi bilan taʼminlash, yaroqsiz elektr tarmoqlari hamda transformatorlarini, simyogʻochlarini beton ustunga yangilash, yoʻl qurilishi kabi ishlar bajarilib, hudud qiyofasi oʻzgardi. Davlat dasturi doirasida hududda Qizilravot hamda Qizilqum qishloqlari ichki koʻchalari asfalt qilindi. Elektr taʼminoti yaxshilanib, transformatorlar yangilandi. Mavjud 12 ta koʻchaga yoritish chiroqlari oʻrnatildi. 

Aynan “Obod qishloq” Davlat dasturi ijrosi doirasida olis va chekka manzilda yashab, umrguzaronlik qilayotgan aholi turmush sharoitini yaxshilash maqsadida 320 oʻrinli 39-umumtaʼlim maktabi 1 milliard 223 million soʻm miqdoridagi mablagʻ evaziga taʼmirdan chiqarilib, zamonaviy qiyofaga kirdi. Bu yerda taʼlim-tarbiya olayotgan yoshlar zamonaviy shart-sharoit yaratildi.

Muassasa yetarli kitob fondi, zamonaviy koʻrgazmali vositalar, kompyuterlar bilan taʼminlangani maqsadga muvofiqdir.

Aholining sifatli tibbiy xizmatga boʻlgan talab va ehtiyojini qondirish maqsadida kunlik 10 nafar bemor qatnoviga moʻljallangan “Qizilravot” qishloq vrachlik punkti 50 bemor qatnoviga moslab yangilandi. Uning “Qizilqum” va “Gugurtli” ambulator punktlari risoladagidek koʻrinishga keltirilib, zarur uskuna va jihozlar bilan taʼminlandi.

Bundan tashqari, ovulda investitsiya dasturi asosida 31-davlat maktabgacha taʼlim tashkiloti qurildi.  60 oʻrinli tashkilotda 4 ta (2 ta toʻliq kunli, 2 ta qisqa muddatli) guruhlar faoliyat olib bormoqda. Qisqa guruhlarning bittasi 38-umumtaʼlim maktabi binosida, bittasi Gugurtli hududidagi xarbiy qismda joylashgan. 47 nafar bolajon tarbiyalanayotgan tashkilotda 8 ta pedagog 10 ta texnik xodim faoliyat olib bormoqda.

Botir Zaripov dastlab mazkur muassasada boʻlib,   tarbiyalanuvchilarni maktab taʼlimiga tayyorlash, bolalarni har tomonlama intellektual, axloqiy, estetik va jismoniy rivojlantirish borasida yaratilgan shart-sharoitlarni koʻzdan kechirdi. “Mahalla yettiligi” bilan suhbatlashib, mavjud muammolarni oʻrgandi. Ularni hal qilish yuzasidan vazifalar belgilandi.
 
Shundan soʻng viloyat rahbari Mahalla fuqarolar yigʻini, 39-umumtaʼlim maktabi va shifokorlik punktini koʻzdan kechirdi. Aholi vakillari bilan muloqot qilib, ularning kundalik hayot tarzi qanday kechayotgani haqida soʻradi. Odamlarning tashvishga solayotgan muammolar bilan qiziqdi.   
 
Shu kuni qizilravotliklar uchun arzonlashtirilgan savdo yarmarokalari ham tashkil etildi. Mutasaddilar hududdagi kam taʼminlangan, ijtimoiy muhofazaga muhtoj, nogironligi bor oilalar holidan ham xabar olishdi. Ularga oziq-ovqat mahsulotlari va yangi yil sovgʻalari ulashildi. Bemorlarning ahvolini yaxshilash boʻyicha zarur chora-tadbirlar belgilandi.

Viloyat hokimligi matbuot xizmati