Buxoro viloyati hokimligi

Jumladan, Shinjon-Urumchi provinsiyasi Shavan shahridagi “Shavan Country Daquan Township Changfeng Plastic Factory Co., Ltd.” kompaniyasi faoliyati bilan toʻliq tanishildi. Kompaniya rahbariyatiga Buxoro tumanining qishloq xoʻjaligi sohasidagi imkoniyatlari tanishtirildi. Kompaniya vakillari 2026-yil  yanvar oyida Buxoro tumaniga kelib, amaldagi qonun talablariga muvofiq yuridik shaxsni roʻyxatdan oʻtkazib, dastlabki bosqichda qishloq xoʻjaligi tarmogʻida 6 ming gektar yerni oʻzlashtirib, serhosil navlarga xos paxta yetishtirish va uni qayta ishlash boʻyicha 50 million AQSH dollariga teng  loyihani amalga oshirishga tayyorligini bildirdi.  

Shuningdek, xorijiy kompaniya oʻz faoliyatini toʻliq va samarali tashkil qilish uchun zarur boʻlgan barcha tarmoq yoʻnalishlarida jami qiymati 35 million AQSH dollariga teng sarmoya kiritishi kutilmoqda. Bu agrar sohada tomchilab sugʻorish uskunalarini shu yerda ishlab chiqarish, plastmas quvur va polietilen ishlab chiqarish, qishloq xoʻjaligi texnikalarini yigʻish va texnik xizmat koʻrsatishni tashkil qilish kabi loyihalar. 

Huddi shu yoʻnalishda Shinjon-Urumchi provinsiyasida faoliyat koʻrsatuvchi yirik korxonalardan biri, “Changzhou Huayi Suspended Floor Co., Ltd.” tumanning oʻn ming gektar noobod yerlarini oʻzlashtirib, paxta yetishtirish va qayta ishlash boʻyicha 100 million AQSH dollari miqdoridagi loyihani amalga oshirish niyatini bildirdi. 2026-yilning 25-yanvarida kompaniya asoschilari Sun Yunxia, Zhang Miao va Xu Ye Fan Buxoro tumaniga kelib, loyiha yuzasidan amaliy ishni boshlashlarini maʼlum qilishdi.

Shu bilan birga, Shinjon-Urumchi savdo-sanoat palatasi vakillari bilan rasman uchrashuv doirasida savdo-iqtisodiy, texnologik va madaniy-gumanitar sohalarda strategik hamkorlikni yanada kengaytirish masalalari muhokama qilindi. Xitoyning Pekin shahrida “China-Europe Association for Technical and Economic Corperation” tashkiloti tomonidan 18–19-dekabr kunlari “Industry Going Global Working Committee” mavzusida forum tashkil etilib, 30 dan ortiq  Xitoy kompaniyasi ishtirok etdi va “B 2 B” hamda “G 2 B” formatdagi uchrashuvlar oʻtkazildi.

Shuningdek, Buxoro tumanida faoliyat yurituvchi “Politex progress” MCHJ rahbari Pekin¬da turli sohalarda faoliyat yuritadigan “SCO Commodity Trade Group Co., Ltd.” tashkiloti bilan hamkorlikda qiymati 10 million AQSH dollari boʻlgan turli xil shisha buyumlar ishlab chiqarish va qiymati 6 million AQSH dollari boʻlgan kapronli qoplar ishlab chiqarishni yoʻlga qoʻyish boʻyicha kelishuvlarga erishdi.

Xitoy Xalq Respublikasi Shanxay provinsiyasida qurilish sohasida faoliyat yurituvchi, mamlakat boʻylab 20 dan ortiq sanoat zonalarini barpo qilgan “Shanghai Pinqi Construction Engineering Co., Ltd.”, “Shanghai Jun Trading Co., Ltd.” kompaniyalari rahbari janob Song Lin Feiy bilan uchrashuvda Buxoro tumanida amalga oshirilishi mumkin boʻlgan loyihalar muhokama qilindi. Chet el delegatsiyasi rahbari 2026-yil fevral oyida oʻz taklif loyihalari bilan Buxoro tumaniga kelishini bildirdi.

Viloyat hokimligi matbuot xizmati