Buxoro viloyati hokimligi

Peshku tumani chekka qishlogʻida shu yil iyul oyidan ish boshlagan davlat-xususiy sheriklik tamoyili asosidagi taʼlim maskani kunduzgi 36 oʻringa moʻljallangan. "Inson" ijtimoiy xizmatlar markazi tuman boʻlimi tashabbusi bilan tashkil etilgan bu maskan hozirda 16 nafar nogironligi boʻlgan oʻsmir bolaga malakali xizmat koʻrsatmoqda. Markaz bolalarning har tomonlama rivojlanishi va oilalarning turmush sharoitini yaxshilashga qaratilgani bilan ahamiyatli. Bunda koʻrsatilayotgan xizmatlarga toʻxtalsak. nogironligi boʻlgan bolalar uchun bepul avtomobil xizmati, bolalarni uyidan markazga va qaytib olib kelish uchun maxsus transport xizmati, talab darajasida uch mahal ovqatlantirish shular jumlasidan.  

Bundan tashqari, markazda bolalarning yoshi va imkoniyatlariga mos ravishda individual va guruhli taʼlim dasturlari, nutqida nuqsoni bor bolalar uchun malakali logopedlar individual mashgʻulotlari, jismoniy tarbiyalash xizmatlari, harakat faolligini oshirish uchun maxsus mashq va oʻyinlar tashkillashtiriladi. 

Eʼtiborlisi, markaz alohida toifadagi, 3 yoshdan 18 yoshgacha boʻlgan  bolalarni qabul qiladi. Ular bolalar serebral falaji, yengil darajadagi, moʻtadil, ogʻir va chuqur darajadagi aqliy zaiflik tibbiy tashxisi qoʻyilgan, koʻr-kar-soqovlik tashxisi boʻlgan bolalardir.

Hukumatimiz koʻmagidagi mazkur markaz nogironligi boʻlgan bolalar va ularning oilalari uchun tayanch boʻlib, ularning jamiyatda oʻz oʻrnini topishi, qobiliyatlarini rivojlantirishi va ota-onalar zimmasidagi yukini yengillashtirishda muhim ahamiyat kasb etadi.

Viloyat hokimligi matbuot xizmati