Buxoro viloyati hokimligi

Ko‘rik tadbirida viloyat hokimi Botir Zaripov, viloyat hokimining tegishli o‘rinbosarlari, viloyat prokurori, Ichki ishlar, Soliq, Favqulodda vaziyatlar boshqarmalari, Buxoro shahar hokimligi rahbarlari, shuningdek, Milliy gvardiya, Obodonlashtirish hamda Qurilish va uy-joy kommunal xo‘jaligi boshqarmalari vakillari, kommunal tizim tashkilotlari mutasaddilari ishtirok etdilar.

Tadbirda so‘z olgan viloyat hokimi Botir Zaripov qish mavsumini betalofat o‘tkazish, yoqilg‘i energiya resurslarini uzluksiz yetkazib berish hamda ulardan oqilona foydalangan holda tejash bo‘yicha belgilangan vazifalarni bajarish ustuvor vazifa ekanligini alohida ta’kidladi.
 
Saf ko‘rigining asosiy maqsadi ham sohaga mas’ul tashkilot va muassasalar, xizmatlarning haqiqiy tayyorgarlik darajasini xolisona baholash, mavjud kamchilik va muammolarni aniqlab, ularni qisqa muddatlarda bartaraf etishdan iborat ekanligi qayd etildi. 

Shu munosabat bilan barcha mas’ul rahbarlardan belgilangan vazifalarga chuqur shaxsiy javobgarlik bilan yondashish, yuzaga kelishi mumkin bo‘lgan favqulodda holatlarni oldindan aniqlab, mavjud kamchiliklarni zudlik bilan bartaraf etish kerakligi aytib o‘tildi. 

Viloyat hokimi rahbarligida idora va tashkilotlar rahbarlari bilan birgalikda kommunal soha tashkilotlari, tegishli muassasalarning mavsumga tayyorgarlik holati ko‘rikdan o‘tkazildi.
Ko‘rik jarayonida 200 dan ortiq maxsus texnikalarning texnik sozligi, to‘liq jihozlanganligi hamda favqulodda vaziyatlarda uzluksiz ishlashga tayyorligi baholandi.

Shunindek, anomal sovuq ob-havo sharoitida shahar bo‘ylab xizmatga jalb etiladigan kuch-vositalar taqsimoti o'rganildi.

Viloyatda mavsumni osoyishta va barqaror o‘tkazish bo‘yicha mas’ullarga topshiriq va ko‘rsatmalar berildi.

Viloyat hokimligi matbuot xizmati