Buxoro viloyati hokimligi

Qorakoʻl tumanida ham koʻchat ekish ishlari jadal surʼatlarda davom etmoqda. Mahallalarning qiyofasini oʻzgartirish, ekologik muhitni yaxshilash va yashil hududlar barpo etish boʻyicha keng koʻlamli ishlar olib borilmoqda. Tumanning Chandirobod mahallasida 22 gektarlik maydon toʻliq tozalandi, tayyorlandi va “Mahalla bogʻi” tashkil etish uchun daraxt nihollari oʻtqazilib, keng koʻlamdagi amaliy ishlar jadal olib borilmoqda. 

Oldin tashlandiq, qarovsiz boʻlib yotgan mazkur maydon avval begona oʻt, xas-xashakdan tozalandi, yer chuqur shudgor qilindi, kerakli mineral oʻgʻitlar bilan boyitildi. Yillar davomida foydalanilmagan boʻsh yer bugun haqiqiy bogʻ yaratish uchun tayyor holga keltirildi.

Tadbirda viloyat hokimining oʻrinbosari Jalol Arashov, tuman hokimligi masʼullari, mahalla faollari, yoshlar hamda keng jamoatchilik vakillari ishtirok etdilar.

– Koʻchat ekib bogʻ yaratish, tabiatni asrab-avaylash xalqimizning ming yillardan beri davom etib kelayotgan qadriyatidir. Ajdodlarimiz yangi tugʻilgan farzandga atab, uning ismi bilan daraxt qadab qoʻygan. Farzand ham, daraxt ham birga kamol topgan. Biz ham shu anʼanani davom ettirib, bugungi avlodga yashil, sogʻlom va obod muhit qoldirishimiz ham qarz, ham farzdir, —deydi tuman hokimi Xurshid Toxirov.

Umuman, joriy yilda chekka tumanda 1 million 228 ming dona mevali va manzarali koʻchat oʻtqazish maqsad qilingan boʻlib, bugunga kelib bu reja 70 foizdan oshdi. Bugun Chandirobodda “Mahalla bogʻi” barpo etishga kirishilgani hududning yanada koʻrkam boʻlishi, yashil hudud soni ortishi va ekologik barqarorlikning mustahkamlanishiga sezilarli hissa qoʻshmoqda. 

—Bugun yoshlarga bogʻ yaratish sirlarini oʻrgatib, koʻchat oʻtqazishda birga qatnashayotganimiz juda quvonchli. Kun kelib bugun parvarishi boshlangan nihollar soyasida qishloqdoshlarimiz dam olib, bizni duo qilishadi,—deydi shu yerlik mehnat faxriysi Mehmonqul Avezov. 

Viloyat hokimligi matbuot xizmati