Qorakoʻl: “Tashabbusli byudjet” tufayli Quyi Yangibozor mahallasi yoʻli asfaltlashtirilmoqda
2025-12-10 15:10:00 / Yangiliklar
Tuman yoʻllardan foydalanish unitar korxonasi ishchi-mutaxassislari tomonidan aholi talab va ehtiyojlaridan kelib chiqqan holda joriy yil ikkinchi yarmida mahalla va qishloqlardagi umumiy 65 kilometrdan ortiq ichki yoʻl asosi tayyorlanib, taʼmirdan chiqarilmoqda.
Bu borada “Tashabbusli byudjet” platformasi orqali joylarda aholining yoʻl bilan bogʻliq tashvish-muammolari bartaraf qilinayotgani quvonarli, albatta. Mazkur loyihaning shu yil ikkinchi mavsumida Quyi Yangibozor mahallasida yashovchi aholi tomonidan ilgari surilgan ichki yoʻllarni asfaltlashtirish loyihasi jami 2 614 ta ovoz toʻplab, gʻolib deb topilgandi. Albatta, bu tashabbus mahalla aholisining oʻz hududini obod qilish borasidagi faolligi va birdamligini yaqqol namoyon etdi.
Gʻolib loyiha doirasida Qoʻlva obod qishlogʻining qariyb 2,5 kilometr uzunlikdagi ichki yoʻliga asfalt qoplamasi yotqizish ishi boshlab yuborildi. Bugun hududda keng koʻlamli yoʻl taʼmirlash harakati davom ettirilmoqda. Ayniqsa, bu qishloq yoʻli aholining bozor-oʻcharga, qolaversa, farzandlarining maktab va bogʻchaga qatnovchi yoʻli boʻlib, shu kunga qadar transport vositalarining harakatlanishi uchun ham xavf-xatar tugʻdirgani koʻp eʼtirozlarga sabab boʻlgan. Endilikda bu muammo “kun tartibidan” olinmoqda.
Yoʻl asosini tayyorlash va asfaltlashtirish jarayoni mahalla jamoatchiligi ishtirokida, ochiq va shaffof tarzda amalga oshirilmoqda. Yangilangan yoʻl hudud qiyofasini butkul oʻzgartirib, aholi turmush tarziga ijobiy taʼsir koʻrsatmoqda. Muhimi, bu ish mahalla aholisining ijtimoiy faolligi, birligi va tashabbuskorligini yanada oshirmoqda.
Viloyat hokimligi matbuot xizmati